- Publika iha: 30 Abril 2012
“Tenki hatun numeru mortalidade inan ho oan, e depois ita mos tenke hamenus moras ne’ebe da’et iha komunidade nia le’et, ne’e prioridade importante atu halo iha tinan ne’e,” hateten Adjuntu Diretor Saude Distritu Baucau, Leonel Guterres, semana kotuk (13/04) iha Baucau.
Adjuntu Guterres dehan, kona ba moras ne’ebe hada’et iha komunidade nia le’et mak hanesan Tuberkulose, lepra, no moras dengue.
Moras hirak ne’e, tuir nia, hada’et tanba hahalok ema nian, ne’ebe lakohi hamos ambiente hanesan bee nalihun iha uma hun ka iha bairo laran.
Kona ba moras dengue, iha tinan ida ne’e “ita iha kazu walu ne’ebe rejistu iha ospital a’as la halimar, barak mak suspeitu, sira ne’ebe suspeitu ne’e mos kazu hotu,” hateten Adjuntu Guterres.
Adjuntu ne’e hatutan, moras dengue iha 2011 durante fulan tolu nia laran (Outubru, Novembru no Dezembru) sa’e maka’as.
“Ami nia pesoal staff ne’ebe toma konta ba saude ambiental ninian, halo tiha abate,fogi no sprit, nune’e bele prevene moras sira ne’e,” hateten tan Adjuntu Guterres.
Iha parte seluk Komunidade Mateus da Costa, hateten maske Governo halo esforsu bar-barak, maibe labarik barak kontinua moras malaria.
“Hau hare iha Ospital Referal Baucau, labarik barak mak sei kontinua baixa iha ne’eba,” hateten Komunidade da Costa.
Bainhira TDW koko konfirma asuntu ne’e ba iha Diretor Jeral Ospital Referal Baucau nian, maibe lakonsege tanba laiha fatin.
