- Publika iha: 25 Setembro 2024
Sekretáriu Estadu Igualdade Inkluzaun SEII husu instituisaun Polísia Nasionál Timor-Leste (PNTL) no Falintil Forsa Defesa Timor-Leste (F-FDTL) atu fó oportunidade ba membru feto sira hodi partisipa iha misaun apoiu ba paz ONU nian.
Sekretáriu Estadu Igualdade (SEI), Elbina Souza de Carvalho, dehan, númeru membru feto ne’ebé partisipa iha misaun apoiu paz ONU ne'e menus tebes, maibé nafatin fó parabéns ba sira, tanba sira konsege ba hala'o ona misaun paz ONU nian.
Nia dehan, SEII nafatin enkoraja PNTL no F-FDTL hodi kontinua envolve feto sira iha F-FDTL no PNTL atu bele partisipa iha misaun iha paz ONU nian.
"Ami hakarak hatete de’it, Sekretáriu Estadu Igualdade nia misaun maka enkoraja feto maluk sira no kapasita feto maluk sira, atu bele iha responsabilidade hodi ezerse sira-nia funsaun ho di’ak iha instituisaun liuliu PNTL no F-FDTL," nia saliente.
Nia hatutan, depende fila fali ba instituisaun rasik, bele kapasita no fó oportunidade nomós empodera feto sira iha instituisaun rasik.
"Ita-nia feto maluk sira mós tenke kapasita sira-nia kapasidade liuhusi formasaun língua no formasaun espesialida ba iha área ne'ebé sira servisu ba, ida-ne'e sai hanesan servisu ba feto maluk sira nomós instituisaun rasik," SEII Carvalho dehan.
Nia dehan, nafatin enkoraja instituisaun sira hotu, atubele fó oportunidade ba feto atu bele fó apoiu ba iha komisaun igualdade iha instituisaun nia laran nomós husu ba feto maluk sira nafatin kapasita aan.
Entretantu Komandante Jerál PNTL Komisáriu Henrique da Costa dehan, iha enkontru nivel altu ne'ebé partisipa xefe Polísia iha Novalorke, ONU fó oportunidade ba polísia Feto Timor-Leste atu envolve iha misaun apoiu Pás iha mundu.
"ONU fó oportunidade barak liuba ita-nia polisia feto, maibé tenki liuhusi selesaun hatene ko'alia, rona no hakerek di'ak ho lian Inglés," nia hatete.
Nia esplika iha tinan 2005, membru PNTL na’in-10 ba kumpri misaun Pás ONU iha nasaun Kosovo, iha polísia feto na’in-ida iha tinan 2010 to'o 2019 mós polísia ba halo misaun iha Giné-Bisau mós envolve feto ida inklui Sudaun Súl feto ida.
"Iha misaun sira-ne'e ita envolve no fó oportunidade ba feto hotu, se feto barak di’ak liu, tanba ita hakarak promove feto, ita laiha intensaun atu impede ema ida, liu-liu feto, ita hakarak fó prioridade barak liuba feto, tanba ita hatene igualdade jéneru ne'e ita hakarak promove sira," informa nia.
Nia hatutan, instituisaun PNTL komandu promove Polísia feto okupa iha kargu sai komandante Munisípiu, Xefe Departamentu sira, ida ne'e signifika feto sira mós iha kapasidade atu sai komandante ida di'ak bele jere instituisaun PNTL ne'e ho di'ak ba futuru.
"Asuntu feto ita tau importante, tanba ne'e gabineti relasaun internasional nafatin kontaktu ho sira no ita sei prepara pedidu ba sira atu halo selesaun ida ne’ebé hatene di'ak lian ingles bele envolve iha misaun apoiu paz ONU iha rai seluk iha mundu," afirma nia.
Nia informa, durante ne'e membru PNTL sira envolve iha Misaun apoiu paz ONU sira barak bele promove nasaun ho bandeira Timor-Leste iha mundu, tanba PNTL preparadu bainhira ONU fó oportunidade envolve iha misaun apoiu paz iha rai seluk.
Enkuantu tuir dadus husi PNTL nian hahú iha tinan 2005 to'o 2022 , Komandu PNTL haruka ona membru Polísia Nasionál Timor-Leste hamutuk na’in-20 kompostu husi feto 3 mane 17 mak partisipa ona iha misaun apoiu pás ONU.