- Publika iha: 05 Agosto 2024
Diretór Servisu Saúde Munisípiu (SSM) Díli, Mateus Pinto, hateten hahú fulan Janeiru-Maiu 2024, sira rejistu kazu ba moras denge hamutuk 556 no na'in-ida mate.
Nia dehan moras denge ne’e moras ida ne’ebé baibain tiha ona, tanba tinan-tinan moras ne’e kontinua iha, maibé agradese, tanba agora moras dengue tun ona, kompara ho tinan kotuk liuba, husi janeiru to'o maiu ne’e 1000 no mate 35 liu, maibé tinan ida-ne’e foin mak 556 no mate ida de'it, ne’e signifika katak moras ne’e komesa menus.
“Agora ne’e ekipa husi Ministériu Saúde la'o hela, bainhira rona ema ida moras denge, ekipa ne’e tun kedas ba ema nia uma hodi hareee no uza fomigasaun fokus ne’e tau iha uma ne’e kuaze kobre husi 200 metros, atu nune’e bele kombate. Ida-ne’e mak agora la'o hela,” nia dehan.
Nia haktuir, atu kombate dengue ne’e komunidade hatene hela, tanba ne’e husu komunidade atu kuidadu aan de'it, se lae moras kona, mai iha ospitál ai-moruk la iha tan araska.
“Tuir relatóriu ne’e tama mai iha sentru saúde Munisipal Díli, hatudu katak sentru saúde Comoro mak kazu dengue sa'e makas liu, tanba tuir ita-nia hareee katak komunidade barak liu iha Díli ne’e só iha Comoro,” nia haktuir.
Iha fatin seluk, Xefe Suku Comoro, Eligio Marçal, hateten moras dengue sa'e makas ne’e tanba komunidade sira la iha konsiénsia oinsá atu bele kuidadu ambiente, dala ruma soe fo'er arbiru de'it, la soe iha fo'er fatin,maibé soe fali iha valeta sira, entaun ida-ne’e hamosu susuk kontinua barak.
“Ita hatene katak suku Comoro ne’e ema barak tebes, tanba ne’e moras ne’e sa’e makas duni. Ita hareee de'it komunidade hela ne’e uma rabat malu de'it, bee dalan de'it mós la iha, udan boot bee sai mós la di'ak, hariis fatin sira bee tabun hamutuk de'it iha uma sorin sira-ne’e, entaun liuhusi buat sira hanesan ne’e ikus hamosu susuk barak, ikus tata ita entaun tenke moras,” nia dehan.
Nia salienta, atu hamenus moras ne’e presiza konsiénsia komunidade nian, hanesan sidadaun ida hakarak dook husi moras sira ne’e presiza ema hotu nia kontribuisaun.