- Publika iha: 25 Setembro 2024
Organizasaun G7+ ho Polísia Nasionál Timor-Leste (PNTL) husu Konsellu Polisiamentu Komunitáriu (KPK) tenke promove diálogu hodi apoiu autoridade komunitária kombate krime iha sosiedade.
Diretór Operasionál G7+, Feliz Piedade, hatete, organizasaun G7+ apoiu PNTL hodi kapasita membru Konsellu Polisiamentu Komunitáriu (KPK) kona-ba kombate krime iha sosiedade no rezolve problema sira ne’ebé mak akontese iha sosiedade.
Nia dehan, atu halo prevensaun ba konflitu ho buka solusaun hodi rezolve konflitu iha komunidade mak tenke liuhusi promove diálogu hodi kombate krime.
"Ita husu ba membru Konsellu Polisiamentu Komunitáriu sira tenke promove diálogu hodi kombate krime no buka solusaun ba problema iha sosiedade," nia informa.
Diretór Operasionál G7+ ne’e dehan, membru Polisiamentu Komunitáriu sira bele aproveita didiak iha formasaun ne’e, nune’e bele implementa iha servisu prevensaun krime iha sosiedade.
"Ohin loron sei nafatin iha konflitu no uza meiu oinsá atu sai husi konflitu, tanba ne'e rekonsiliasaun presiza promove, tuir kultura Timor-Leste nian mak nahe biti boot, tuur hamutuk ko'alia ba malu, esperiénsia iha mundu hatudu ona katak, akontese iha suku laran, ema uza forsa no violénsia, nunka atu rezolve problema," nia saliente.
Nia husu atu promove diálogu ne'e importante tebes hodi rezolve problema iha sosiedade liuhusi rekonsiliasaun hodi kombate krime.
Iha fatin hanesan, Komandante PNTL Munisípiu Dili, Superintendente Xefe Orlando Gomes, dehan formasaun ne’ebé mak Organizasaun G7+ apoiu ne'e ho objetivu atu reativa fila fali KPK iha suku hodi halo prevensaun konflitu iha komunidade.
"Formasaun ne’e atu sira bele hatene loloos sira-nia misaun ho meneira sira ne’ebé mak bele utiliza hodi rezolve konflitu liuhusi dalan promove diálogu," nia hatete.
Tanba ne'e nia dehan, KPK bele prevene liuhusi apoiu patrollamentu polisia nian iha tempu kalan, hakbesik ba komunidade hodi promove diálogu.
Entretantu Xefe Suku Bairru-Pité Joanina Alves, hatete hanesan lideransa komunitáriu iha suku Bairru Pité, ba dahuluk sente kontente, segundu hakarak hato'o agradese ba komandu PNTL Munisípiu Dili, G7+, The Asia Fundation, no NGO Belun nia prezensa hodi fahe informasaun sira kona-ba oinsá atu rezolve problema iha suku laran.
"Ho diálogu ida-ne'e atu reativa fila-fali KPK iha suku Bairru Pité, ba ami hanesan lider komunitária kontente tebes, ami-nia pedidu ba Komandu PNTL," nia informa.