- Publika iha: 20 Setembro 2024
Falintil Forsa Defesa Timor-Leste (F-FDTL) liu-liu Komponente Forsa Naval Lizeira dadaun ne'e la iha ekipamentu ne’ebé adekuadu hodi kombate atividade peska ilegál.
Komandante Komponente Naval Komodoro Higinio das Neves hatete, forsa mariña treinadu hodi halo atuasaun no asegura seguransa iha tasi territoriál, maibé iha problema ho ekipamentu.
Nia dehan, kada loron Sentru Operasaun Komar iha baze komponente naval deteta ró hamutuk 10 mak halo movimentu ilegál tama mai tasi teritoriál Timor-Leste hodi atividade peska ilegál liu-liu iha kosta sul.
"Ita deteta de’it, tanba ita la iha ekipamentu ne’ebé adekuadu hodi kombate atividade peska ilegál ne’ebé kada loron sempre akontese iha tasi territoriál," Komandante Komponente Navál Komodoro Neves dehan.
Nia dehan, ekipamentu mak seidauk adekuadu hodi utiliza halo misaun susesu, bainhira kombate peskadór ilegál sira tama tasi territoriál Timor-Leste nian.
"Ita halo servisu kontrolu iha Sentru Operasaun Komar iha baze komponente naval, kuandu deteta ró ilegál tama iha tasi territóriu ami bele hato’o relatóriu fó informasaun ba ajénsia sira ne’ebé iha ligasaun hodi hala'o orden operasaun nian atu halo prevensaun iha tasi," nia informa.
Nia dehan, durante ne'e forsa naval lahalo de’it kontrolu ba atividade peska ilegál, maibé halo mós salvamentu ba komunidade sira ne’ebé hetan dezastre iha tasi-laran.
Entretantu Xefe Estado Maior Jeral F-FDTL Tenente Jenerál Domingos Raul Falur Rate-Laek dehan, governu sosa ona ró rua husi governu Australia, maibé seidauk bele lori mai Timor-Leste.
"Tuir loloos ró rua-ne'e to'o ona iha Timor-Leste iha fulan Maiu tinan 2024 ne'e, maibé tanba kondisaun infraestrutura iha Komponente Naval Lizeira liu-liu portu seidauk iha hodi para ró refere," nia informa.
Tanba ne'e nia dehan, dadaun ne'e foin hahú halo konstrusaun ba portu naval no bainhira finaliza ró rua-ne'e bele mai ona hodi fasilita servisu komponente naval hodi kombate atividade peska ilegál iha tasi.