Quinta, Junho 13, 2024
Total visitors: 766366

Responsavel Postu Saúde Suku Fahinehan, Postu Administrativu Fatuberliu, Musipiu Manufahi, Parteira Manuela Fernandes hateten, iha postu saúde Fahinehan identifika pasiente ho ISPA (Infeksaun Sistema Respiratoriu) ba labarik na'in neen (6) iha fulan janeru-maiu 2024.

Parteira Manuela Fernandes hateten, iha postu saúde Fahinehan identifika pasiente ho ISPA (Infeksaun Sistema Respiratoriu) ba labarik na'in neen (6) iha fulan janeru-maiu 2024.

Nia dehan, moras ISPA impaktu mai husi labarik sira halimar rai rahun no konsumu bee matak, tanba ne’e inan-aman sira sira tenke kuidadu oan sira hodi kuandu oan sira moras tenki lori ba tratamentu.

“Moras ISPA iha postu saúde Suku Fahinehan durante ne’e rejistu moras ne’ebé barak mak moras ISPA ba labarik nain 6, moras ne’e akontese ba labarik sira tanba mós kondisaun klimátika ne'ebé la di'ak. Ita haree ba iha suku Fahinehan ne’e tempu bain loron rai rahun makas, no komunidade sira barak mak konsumu de'it bee matak, entaun moras ne’e fasil atu kona ita,” nia dehan via-telefone.

Nia apela mós ba inan-aman sira atu kuidadu oan sira iha tempu bain loron, labele husik halimar iha rai rahun no hemu bee matak, kuandu inan-aman sira la kuidadu oan sira mak moras ISPA sei kontinua aumenta.

Iha parte seluk, Xefe suku Fahinehan, Postu Administrativu Fatuberliu, Munisípio Manufahi, Eugenio Manuel Araujo Costa Amaral hateten, labarik sira-ne’e afeta ba moras ISPA, tanba impaktu mai husi situasaun klima, se klima ne’e di'ak entaun moras ne’e menus, se klima ne’e la di'ak entaun moras ne'e aumenta.

“Ita presiza tau atensaun ba moras ISPA ne’ebé afeta ba labarik sira. Ba ita ema boot ne’e ha'u sente ita bele tahan moras ne’e, maibé labarik ki’ik sira, ne’e susar atu tahan, tanba ne’e ita haree ba klima karik tempu bain loron rai rahun barak, entaun ita presiza tau matan ba labarik sira nomós tenke tau matan mós ba bee sira ne’ebé ita atu konsumu. Labele naran konsumu bee, se lae mak ita sei la sees husi moras sira ne’e,” nia dehan.

Nia husu ba inan-aman sira atu kuidadu oan sira, no bainhira labarik sira moras susar atu lori lalais ba konsulta iha postu saúde.