ME Distribui Materiál Konstrusaun Ba Eskola Afetadu Dezastre Naturais

Governu liuhusi Ministériu Edukasaun halo ona distribuisaun materiál konstrusaun ba eskola ne’ebé mak afetadu ba dezastre naturais.

Diretór Diresaun Nasionál Edukasaun Inkluzivu no Asaun Eskolár iha Ministériu Edukasaun, Fernando do Santos dehan, eskola ne’ebé mak sira rejistu hetan estragus kauza husi dezastre naturais hamutuk eskola ualu (8) husi munisípiu Ermera, Viqueque, Díli no Liquiçá.

Nia dehan, materiál konstrusaun eskola sira-ne'e preparadu ona, no Ministériu Edukasaun distribui uluk ba eskola sira ne’ebé identifikadu estragus totál.

"Ita distribui uluk ba eskola tolu ne’ebé mak identifika estragus totál mak hanesan, eskola EBF Baura Liquiçá, EBF Ulusu iha Viqueque no EBC Boboe Leten Munisípiu Ermera nian," nia dehan.

Nia dehan governu fó uluk prioridade hodi distribui materiál konstrusaun ba eskola tolu ne'e, tanba hetan estragus totál no susar tebes atu asesu ba estrada bainhira tempu udan.

"Materiál ne’ebéita distribui mak hanesan, kalen, ai, besi, sumente, pregu, sasan konstrusaun seluk tan no osan konstrusaun nian," DNAEI Santos dehan.

Enkuantu ba eskola hirak ne’ebé seidauk distribui materiál konstrusaun ne’e, tanba kondisaun eskola sei bele utiliza, nune'e mós asesu ba estrada di’ak.

Entretantu Deputada Aliança da Conceição dehan, infraestrutura eskolár sira barak mak estragus la’ós, tanba de’it afeta ba dezastre, maibé tanba balun konstrusaun ne'e antigu no to'o ohin loron seidauk realibita.

"Husu Ministériu Edukasaun atu tau mós atensaun ba eskola sira ne’ebé mak nia konstrusaun ne'e iha tempu antigun ne’e, tanba risku ba estudante no profesór sira-nia vida iha tempu udan no anin," nia dehan.