Inan Ferik Sira Ne’ebé Simu Osan Idozu Nafatin Fa’an Sasán Iha Dalan Ninin

Inan ferik sira ne’ebé simu ona osan terseira-idade (idozu) nian, nafatin fa’an sasán iha dalan ninin, tanba parte relevante sira-nia regulamentu ka lei ladún forte hodi regula idozu sira-ne’e.

Avo-feto Elsa Amaral Guterres nu’udar idoza ne’ebé simu ona nia direitu, maibé kontinua fa’an sasán lori la’o iha dalan ninin, ho razaun osan ne’ebé simu husi pensaun ba idozu nian la to’o, tanba balun fó ba bei-oan sira no fós mós folin karun.

Nia deklara, nia hela iha Taibessi no simu ona osan terseira-idade nian, babain nia la’o fa’an sasán hosi dadersan to’o lorokra’ik.

“Ha’u hela iha Taibessi ha’u mai fa’an sasán lori la’o ne’e, loro-loron ha’u la’o husi dadersan to’o lorokra’ik, tanba ema sosa seidauk hotu mak ha’u fila ema iha uma han hotu. Loro-manas ha’u han de’it paun no sosa bee depois hemu, etu ne’ebé ho na’an ha’u labele han, tanba ema doutór bandu ha’u labele han na’an,” deklara Avo Elsa.

Iha sorin seluk estudante hosi Universidade Nacional Timor Lorosa’e (UNTL), Nemézia Mazarella de Assis Belo hateten, idozu sira ne’ebé hetan ona sira-nia direitu, presiza deskansa iha uma, tanba agora tempu sira-nian atu deskansa.

“Nu’udar estudante no akadémiku ida, ha’u senti ladún di’ak no la konfortável, tanba tuir loloos ita haree idozu sira-ne’e hanesan ferik ho katuas sira ne’ebé laiha forsa atu halo servisu, tempu ne’e atu deskansa nian, labele halo servisu sira seluk, se sira sei fa’an sasán tuir dalan, ida-ne’e hanesan kanek boot ida ba ita,” Nemézia hateten.

Nia mós rekomenda ba parte relevante sira atu bele halo regulamentu ida, atu bele hapara servisu ne’ebé bele fó impaktu ba idozu sira-nia kondisaun.

“Husu ba parte relevante sira atu halo buat ruma no presiza halo regra rigurozu ida atu bele hapara idozu sira, nune’e labele fa’an sasán tuir dalan ninin, sira presiza deskansa, tanba sira-nia tempu atu deskansa nian,” nia rekomenda.