Tratamentu Ba Kazu Asidente Kada Loron Aas Iha Emerjénsia HNGV

Vise-Ministru Saúde ba Operasionalizasaun Hospitais, Dr. Flávio Brandão Mendes de Araújo dehan, dadaun ne'e tratamentu ba kazu asidente tráfiku kada loron rejistu aas iha sala emerjénsia Hospital Nacional Guido Valadares (HNGV), iha Díli.

Nia hatete, kazu asidente tráfiku ne’ebé rejistu iha sala emerjénsia ne'e, la’ós akontese de’it iha kapital Díli, maibé husi territóriu laran tomak, bainhira halo tratamentu iha munisípiu ladun di’ak no tenke transferénsia hotu ba HNGV.

"Tramentu ba kazu asidente tráfiku kada loron rejistu atus-rua (200) to'o atus-tolu (300) iha sala emerjénsia Hospital Nacional Guido Valadares hodi la fó espasu ba tratamentu moras sira seluk," Vise-Ministru Mendes informa iha Díli.

Nia hatete, liga ba númeru pasiente ne'ebé mak rejistu aas ne'e iha HNGV sei hasoru hela problema kona-ba espasu ne’ebé la sufsiente hodi halo tratamentu ba pasiente sira seluk.

"Ita-nia espasu la sufsiente hodi akumula ita-nia pasiente sira ne’ebé mak rejistu aas kuaze 200 to'o 300 kada loron," nia salienta.

Nia hatutan, ho númeru pasiente ne'ebé boot espera katak tinan oin problema espasu iha HNGV bele rezolve, hodi bele halo tratamentu di’ak ba pasiente sira, nune'e bele akumula ho númeru ne'ebé mak boot.

Entretantu, Komandante Policia Tránzitu Seguransa Rodaviáriu Nasionál, Superintendente Asistente Luis da Costa dehan, kazu asidente tráfiku ne’ebé akontese ne'e kauza husi fatór humanu rasik.

"Kazu asidente ne’ebé akontese no rejistu aas ne'e kauza husi fatór humanu, tanba bainhira kondús karreta ka motorizada iha dalan públiku la respeita sinais tránzitu sira, no konsumu alkohol lanu. Ida seluk mak la kontrola kondisaun karreta no motorizada nian molok halo movimentu," nia informa.

Enkuantu tuir dadus ne’ebé mak Tránzitu Seguransa Rodaviáriu Nasionál rejistu iha fulan maiu ne'e kazu asidente tráfiku iha territóriu laran hamutuk 2414 mate na’in 15, kanek todan na’in 796, no seluk kanek kmaan.