Governu Seidauk Fó Lisensa Ba Ezisténsia Ensinu Supérior Foun 3

Governu liuhusi Ministériu Ensinu Supérior Siénsia no Kultura (MESSK) seidauk fó lisensa ba ezisténsia ensinu supérior foun tolu hanesan, Fundasaun Inteligen Santu Antonio, Akademika Polísia no GEM, tanba seidauk kumpri regra lisensamentu.

MESSK Jose Honório da Costa Pereira Jeronimo dehan, durante ne'e sira simu dokumentu kona-ba kriasaun instituisaun ensinu supérior tolu ne’ebé mak rejistu hodi hetan lisensa atu sira bele halo sira-nia atividade aprendisajen.
Nia dehan, husi dokumentu ne’ebé mak instituisaun ensinu supérior foun tolu (3) hatama ne'e, la integra ba regra ne’ebé iha ba kriasaun instituisaun ensinu supérior.

"Ita la atribui lisensa operasaun ba instituisaun ensinu supérior foun tolu (3) ne'e, tanba seidauk priense kritériu ne’ebé mak iha," MESSK Honório dehan.

Tanba ne'e nia dehan, dokumentu hirak ne'e ministériu haruka fila fali atu sira bele haree didi’ak no estudu viabilidade hodi prense tiha regra hirak ne'e no submete fali hodi halo avaliasaun.

"Ita avalia mak priense ona regra hirak ne ita sei fó lisensa hodi halo sira-nia operasaun,maibé la prense ita la fó lisensa," nia hatete.

Nia dehan, kriteira ne’ebé atu prense hodi estabelese instituisaun ensinu supérior foun iha 10 mak hanesan, tenke iha rai rasik 5 hektar, iha dosente rasik tuir nivel, tenke iha osan ba utilizasaun tinan rua nian 1.6000 ital no seluk tan.

Iha parte seluk Komandante Sentru Formasaun Polísia (CFP) Superintendente Xefe Arguiminho Ramos dehan, sira lori ona Akademia Polísia Nasionál Timor-Leste (PNTL) ba rejistu iha MESSK atu bele hetan lisensa sai hanesan intituisaun ensinu supérior ida.

"Ita-nia dokumentu sira haruka fila fali no fó durasaun mai ita atu halo estudu viabilidade depois ita sei entrega fali iha dia 30 de Julho atu sira bele halo verifikasaun segundu," nia dehan.

Nia dehan, sira iha rekursu sufisiente nomós iha rai rasik no osanmentu mós sufisiente, maibé sira sei hadia di’ak liutan tuir estatutu no lei orgánika PNTL nian no lori ba hatama atu bele hetan reakreditasaun hodi bele funsiona.