- Publika iha: 13 Agosto 2024
Vise-Primeiru-Ministro, Ministru Koordenador Asuntu Sosiál, Ministru Dezenvolvimentu Rural no Habitasaun Komunitária Mariano Asanami Sabino hateten, IX governu kompremitidu atu fornese servisu saúde ne’ebé ho kualidade, atu bele hadia problema lubuk ida ne’e Timor-Leste enfrenta hela durante ne’e.
“Atu fornese servisu saúde ida ne’ebé ho kualidade hodi hadia problema hirak ne’e, ida-ne’e responsabilidade Ministra Saúde ho vise nain rua nian, tanba ida-ne’e komprimisiu Primeiru-Ministru nian, ne’e ita tenke hala’o tenke esforsu loron-loron,” nia dehan iha Hotel Timor, Díli.
Nia dehan, problema mal-nutrisaun ne’ebé kontinua aumenta, moras oioin aumetan nafatin iha Timor-Leste to’o ema atu komesa la fiar ona ospital sira, moras barak tenke haruka sai ba rai liur hodi halo tratamentu, tanba ne’e IX governu kompremitidu katak sei hadia Sistema Saúde no fornese servisu saúde ne’ebé ho kualidade.
Iha fatin hanesan Vise-Ministru Para a Operasionalização dos Hosptais, Dr. Flavio Brandão Mendes de Araujo hateten, atu hadia Sistema Saúde iha Timor-Leste presiza envolve ho esforsu iha aspetu sira ne’ebé importante hanesan infraestruturas, rekursos humanos, servisu saúde primariu, asesu ba medikamentu no teknolojia, no política.
“Ita sei hadia problema sira-ne’e iha futuru, tenke halo kolaborasaun produtivu ne’ebé di’ak, hodi haree liuba ospital, tanba ne’e governu atu bele introdús manejementu públiku foun ba ita-nia programa, no iha buat barak ne’e mak ita halo hodi hadia Sistema saúde iha Timor-Leste,” nia dehan.
Nia dehan, problema barak mak Ministériu Saúde presiza hadia maka realiza kampaña edukasaun saúde iha nivel komunitária hodi fó informasaun kona-ba prevensaun doensa, nutrisaun no moris di’ak no presiza estabelese no mantein klinika, postu saúde, no ospitál sira ho karreta no ekipamentu ne’ebé di’ak, hodi asegura nafatin servisu saúde iha nivel munisípiu sira ho efisiente.