- Publika iha: 24 Maio 2024
Rekrutamentu membru foun Polísia Nasional Timor-Leste (PNTL), governu liuhusi Ministeriu Interior (MI) oferese kouta porsentu 20% ba kandidata sira feto, husi planu atu rekruta hamutuk na’in 500.
"Rekrutamentu ne'e ita fó oportunidade ba foinsa’e feto sira atu bele mai kompete, tanba ita iha kouta pursentu 20% ba feto, maibé bainhira iha teste mak liuhusi pursentu ne'ebé ita fó di’ak liu tan,” Ministru MI, Francisco Guterres, dehan.
Ministru husu ba feto foinsa’e sira hahú husi idade 18 to'o 25 bele prepara mentalidade, saúde, no kapasidade nune'e mós altura tenke to'o 160cm hodi bele kompete iha vaga foun PNTL nian refere.
"Rekrutamentu ne'e ita preparadu ona hahú husi dekretu lei, nune'e iha planu ba rekrutamentu nian. Dadaun ne'e prepara hela orsamentu kona-ba farda no ekipamentu atu membru rekruta sira bele utiliza bainhira treinu," nia dehan.
Nia salienta, rekrutamentu tau importánsia tebes ba feto nune'e bele kompleta númeru feto iha instituisaun tanba iha PNTL dadaun ne’e feto menus liu kompara ho mane.
Iha parte seluk, joven feto Osvalda Maria Anunseição dehan, durante ne'e nia akompaña partisipasaun feto iha instituisaun PNTL ne'e menus liu no feto ne’ebé mak okupa iha kargu xefia sira sura ho liman de’it.
"Ita rekrutamentu ba membru foun ne'e ha’u sujere atu bele numeru ba feto ne'e boot liu kompara ho mane atu nune'e bele enkoraja ami joven feto sira hodi kompete," nia dehan.
Nia dehan, husi númeru ne’ebé fó sai katak 500 ne'e no fó pursentu 20% ba feto ne'e sei menus liu, karik bele kouta pursentu 40% ba feto.