Aldeia Ruanulu Iha Munisípiu Ainaro Seidauk Asesu Ba Eletrisidade

Reprezentante Prezidenti Autoridade Munisípiu Ainaro, Ruivo Barros Magno hateten, iha Munisípiu Ainaro iha Suku hamutuk ruanulu resin ida (21) distribui ba aldeia atus ida tolunulu resin ida (131), maibé aldeia ruanulu resin ida (21) mak seidauk asesu ba eletrisidade.

“Suku ruanulu resin ida-ne’e mak asesu hotu ona ba eletrisidade, maibé aldeia ruanulu resin ida mak seidauk asesu ba eletrisidade, ezemplu hanesan iha Suku Leolima aldeia Goulau komunidade balun seidauk asesu eletrisidade, tanba sira hela tama liuba laran, no komunidade sira hela dook malu, entaun sira-ne’e mak seidauk asesu ba eletrisidade,” nia klarifika liuhusi via-telefone.

Nia esplika, komunidade sira ne’ebé hela iha aldeia sira-ne’e hela dook malu, entaun susar atu dada eletrisidade ba sira, maibé autoridade munisípiu nafatin servisu hamutuk ho EDTL, atu oinsá bele dada eletrisidade ba komunidade sira ne’ebé hela iha aldeia sira ne’ebé seidauk asesu ba eletrisidade.

Iha fatin seluk, Koordenadór EDTL Munisípiu Ainaro Julio de Sá Benevides hateten, munisípiu Ainaro iha aldeia balun mak to’o agora seidauk halo instalasaun eletrisidade, tanba seidauk foti dadus kompletu.

“Husi Postu Administrativu Hatudo iha Suku Leolima Aldeia Goulau, Suku Foho Ailiko Aldeia Ainaro Ki’ik, Bonuk, Bobe, Postu Hatubuliko Suku Mulo, Aldeia Leohetu, Postu Maubise Suku Maubise hela aldeia ida mak seidauk finaliza no sei iha hela prosesu finalizasaun.

Suku Liurai hetan ona tenderizasaun husi kompañia, maibé prosesu implementasaun seidauk la'o no tan Suku seluk tan, sei foti hela dadus, atu nune’e bele halo prosesu instalasaun ba komunidade sira-ne’e,” nia dehan

Nia esplika, iha aldeia balun ne’ebé prosesu la'o ona, maibé to’o agora seidauk finalize prosesu instalasaun ne’e husi kompañia.

“Prosesu eletrisidade ne’ebé impaktu husi kompañia sira mak servisu la ho responsabilidade tanba ne’e konstrusaun no instalasaun ne’e tarde to’o agora seidauk finaliza,” hatutan.

Nia salienta, konstrusaun no instalasaun tarde ne’e problema ida mai husi kompañia, ida mós tanba EDTL nia material ba konstrusaun ne’e seidauk kompletu, tanba ne’e iha aldeia balun konstrusaun de'it mós seidauk la'o to’o agora.