- Publika iha: 25 Setembro 2024
Sekretáriu Estadu Igualdade (SEII), apoiu orsamentu ho montante $20 mil hodi hakbiit ekonomia husi grupu feto rural sira iha territóriu laran.
SEII Elvina Souza de Carvalho hateten, orsamentu ne'ebé mak apoiu ne'e atu fasilita grupu feto sira ne’ebé mak rejistu ona hodi halo negósiu hanesan, soru tais, loke kios, loke restorante kiik hodi bele ajuda ekonomia uma-laran.
Niadehan, dadaun ne'e atividade husi grupu feto sira halo ne'e, la’o hela no husi SEII nafatin halo monitorizasaun ba sira-nia progresu.
"Ami apoiu feto no grupu feto sira-ne'e, hodi hadia sira-nia ekonomia uma-laran, tanba ne'e nu'udar misaun ida husi SEII nian hodi empodera feto iha vida ekonomia," SEII Carvalho dehan.
Nia dehan, orsamentu ne'ebé mak SEII apoiu ne'e mai husi fundu tranferénsia públika ne'ebé dedikadu ba grupu feto sira, atu hodi apoiu finaseriu uitoan, para hodi halo atividade ekonomia, hodi bele kontribui ba iha rendimentu família.
"Ita bele konsidera iha feto lubuk ida maka konsege asesu ba fundu sira-ne'e, ho hetan rendimentu husi nia atividade sira-ne'e," niain forma.
Niahatete, grupu feto hirak ne'e, mai husi munisípiu 13 iha territóriu laran tomak ne'ebé rejistadu hodi asesu ba fundu ne'e.
Entretantu, Reprezentante Grupu Feto Angelina dos Santos agradese ba governu liuhusi Sekretáriu Estadu Igualdade no Inkluzaun, tanba bele apoiu ona no hadia ekonomia uma-laran liu husi negósiu kiik sira.
“Ho apoia ne’e ami foin hetan oportunidade di’ak tebes hodi hadia ami-nia ekonomia família," niadehan.
Nia hatete, apoiu orsamentu ne’ebé mak sira-nia grupu hetan hamutuk $ 4 mil hodi kria sira-nia negósiu hanesan halo kréditu.