Vizita Sua Santidade Bele Hametin Sentidu Umanu Iha Timor-Leste

Luis Ximenes hanesan Sarani Katólika husi Diosese Baucau nia esperansa liuhusi vizita Sua Santidade Papa Francisco nian bele hametin sentidu umanu iha Timor-Leste.

Nia dehan, sentidu umanu ne'e ba povu Timor-Leste tomak, atu Governu no Sarani sira tomak, hodi responde ba situasaun moris ne’ebé povu enfrenta tenke responde ho dame no paz.

"Ha’u hanoin ida-ne'e mak Sua Santidade Papa nia hakarak, atu rezolve no fó moris dignu no dame paz hodi apoiu ema kbiit laek, ki’ak, mukit nomós vulneravel sira hotu tenke trata ho sentidu umanu," nia dehan.

Ximenes ne’e hatutan, ko’alia kona-ba sentidu umanu liga ba situasaun sira ne’ebé Timor-Leste hasoru, rezolve problema povu nian liu-liu negosiante sira, no vítima eviksaun sira la ho sentidu umanu.

"Ha’u-nia esperansa husi vizita Sua Santidade Papa Francisco iha Timor-Leste bele hametin liu tan sentidu umanu iha Timor-Leste tomak tantu governu ho povu, nune'e bele moris tuir doutrina ne'ebé mak haklaken evanjelizasaun ne'e ba paz no dame tuir Santo Padre nia hakarak," Sarani Katólika Diosese Baucau Ximenes nia esperansa.

Entretantu, Joventude Katólika Diosese Díli Grabiel de Oliveira dehan, nia esperansa ba vizita Santo Padre Francisco iha Timor-Leste bele kontribui ba dame paz iha povu tomak iha Timor-Leste liu-liu lideransa Timor-Leste nian hodi hadomi no respeita malu ho kuda sentidu umanu hodi tratra nia povu ho dignu.

Nia dehan, iha vizita ida-ne'e mós hanesan istória boot ida ba Timor-Leste liu-liu jerasaun foun sira.

"Ohin loron ha’u kontente tebes tanba bele haree direita Sua Santidade Papa Francisco nia oin no simu bensaun direita," nia informa iha Fatuhada, Díli.

Iha parte seluk Apalonia Pereira de Jesus Sarani Katólika husi Diosese Maliana dehan, prezensa Papa Francisco iha Timor-Leste espresa ho sentimentu haksolok ho matan been, tanba hanesan milagre.

"Ha’u la iha liafuan seluk hodi espresa ha’u-nia sentimentu, maibé ho matan been mak esplika," nia salienta iha área Timor Plaza.

Nia esperansa ba vizita Sua Santidade ne'e bele lori domin, paz, ba rai di’ak ne'e iha sosiadade, familia no valoriza dignidade umanu ema nian iha rai Timor-Leste.