Komunidade Suku Kamea Balun Sei Halerik Nafatin Ba Bee Moos

Joanina do Santos hanesan komunidade Aldeia Kakeu Laran, Suku Kamea, Postu Administrativu Kristu Rei, Munisípiu Díli, hateten, durante ne’e komunidade balun iha Suku Kamea liuliu aldeia Kakeu Laran komunidade sira-ne’e to’o agora la asesu ba bee.

“Ami iha Suku Kamea, Aldeia Kakeu Laran ne’e balun la asesu ba bee moos, entaun bainhira ami atu kuru bee tenke la'o dook, ou dala ruma mai liu kedas estrada boot hodi kuru bee,” nia dehan iha Kaikoli, Díli.

Nia esplika, komunidade sira hela iha ne’e kleur ona, maibé bee ne’e sira lalin de'it, to’o agora ne’e sira sei lalin bee nafatin.

“Ami husu ba governu, atu haree netik problema sira hanesan ne’e, tanba ami sira hela iha Suku Kamea, Aldeia Kakeu Laran ne’e kuitadu uluk to’o agora bee moos ne’e ko’alia de'it, maibé nunka atu mosu mai, tanba ne’e husu ba governu tau netik matan mai ami sira-ne’e,” nia esklarese.

Iha fatin seluk, Vise-Prezidenti Komisaun Ezekutivu BTL, E.P ba Asuntu Sistema Bee, Saneamentu no Drenajen, Gustavo da Cruz hateten, komunidade sira ne’ebé iha Suku Kamea, Aldeia Kakeu Laran la asesu ba bee moos, tanba sira hela kedas iha foho leten, tanba ne’e sira susar atu hetan bee moos.

“Kondisaun ita-nia komunidade sira-ne’e hela iha Aldeia Kakeu Laran ne’e ami hatene muintuvem, sira asesu ba bee moos ne’e husi mota Bekora ulun, maibé Aldeia Kakeu laran parte kraik ne’e bee la'o normál, maibé komunidade sira balun hela fali iha laletek ne’ebá, entaun bee la bele sa'e to’o ba leten,” nia dehan.

Nia salienta, komunidade sira ne’ebé hela iha Aldeia Kakeu Laran leten ne’e BTL iha ona hanoin atu dada bee ba iha leten, tanba ne’e lakleur tan komunidade sira-ne’e bele asesu ona ba bee moos.