ME Sosa Tan Karteira Eskolár 10,000 Hodi Distribui Ba Eskola Sira

Direitór Diresaun Nasional Infraesturtura no Edukativu, iha Ministériu Edukasaun (ME), Helio Lopes, dehan, dadaun ne'e ministériu prepara tan kadeira hamutuk 10,000 hodi distribui ba eskola ne’ebé falta kadeira no meza iha territóriu laran.

"Ita sosa tan karteira eskolár 10,000 ne'e hodi kompleta ba eskola sira ne’ebé mak sei menus kadeira no meza," nia hatete.

Nia informa, kadeira 10,000 la distribui ba eskola hotu, maibé distribui ba eskola sira ne’ebé identifikadu menus duni kadeira no meza.

"Ita husu ba eskola balun ne’ebé mak kadeira no meza sei di’ak ne'e atu uza lai, tanba ita sei distribui deit ba eskola sira ne’ebé mak kadeira no meza aat ona no menus," nia informa.

Nia dehan, husi munisípiu balun liu-liu Liquiçá mós aprezenta ona proposta mai Ministériu Edukasaun kona-ba problema menus kadeira iha eskola.

Enkuantu nia dehan, antes ne'e ME halo ona distribuisaun ba kadeirano meza hamutuk 8,000 ba eskola sira iha territóriu laran tomak.

Entretantu, Diretór Edukasaun Munisípiu Liquiçá Julio da Silva dehan, dadaun ne'e iha munisípiu Liquiçá maioria eskola sira enfrenta problema menus kadeira no meza.

"Maibé ita hatama ona proposta ba Ministériu Edukasaun hodi husu kadeira no meza hodi rezolve problema falta kadeira no meza ba eskola sira iha munisípiu Liquiça ne’e," nia informa.

Nia dehan, antes ne'e sira simu ona kadeira no meza eskola balun hetan 100, 150 no balun hetan 200 ida ne'e la sufsiente tanba estudante barak liu no kada tinan númeru estudante sempre aumenta.

Enkuantu totál eskola iha munisípiu Liquiça hamutuk 27 kompostu husi pre-eskolár to'o ensinu sekundáriu.