- Publika iha: 13 Setembro 2024
Bombeiros sosa tan viatura Prontu Socorro Lizeira (PSL) hitu (7) ho ekipamentu pesoál ba funsionamentu postu hitu (7) ne’ebé instala iha área protejidu.
Diretór Bombeiros Nasionál Paul Maia dehan, ekipamentu ne’ebé mak sosa ne'e hodi funsiona postu hitu (7) mak hanesan, Watu-Carau, Tilomar, Atu Beco, Atsabe, Natarbora no Ataúro.
Nia dehan, postu 7 ne'e instala iha área hirak ne’ebé mak identifika protejidu, atu bele halo atendimentu lalais karik mosu insendu ruma, la presiza Bombeiros husi munisipiu,maibé sira mak halo intervensaun rasik.
"Ita sosa tan viatura Prontu Socorro Lizeira (PSL) hitu (7) ho ekipamentu pesoál hanesan farad, sepatu, sapeo ba membru sira utiliza, hodi halo servisu prevensaun iha área protejidu sira," Diretór Nasionál Bombeiros Maia hatete.
Enkuantu nia hateten, área protejida hirak ne’e dook tebes husi Postu Bombeiros munisípiu, bainhira akontese insendiu bombeiros sempre halo atuasaun tarde, tanba husi distánsia ne’ebé dook, nune’e mós dalan aat.
"Ita hakarak halo ona funsionamentu ba postu sira ne’ebé mak instala iha área protejidu liuhusi ekipamentu ne’ebé mak ita kompleta ona," nia informa.
Enkuantu total orsamentu hodi sosa viatura no ekipamentu hirak ne'e hamutuk rihun atus neen neenulu resin lima $655.000
Entretantu membru Parlamentu Nasionál Deputada Aliança Conceição dehan, área sira ne’ebé mak identifikadu ona protejidu ne'e prezensa Bombeiros importante tebes.
"Ita apoiu programa governu nian liu-liu funsionamentu postu Bombeiros iha área protejidu ne'e presiza tebes hodi bele responde espesífiku ba insendiu ne’ebé afeta iha área refere," nia hatete.
Tanba ne'e, nia husu ba governu atu kompleta ekipamentu avansadu atu bele moderniza sira-nia servisu hodi kombate insendu.