Diretóra Ezekutivu Rezeita Seidauk Hapara Funsionáriu Parmanente Iha HNGV

Diretora Ezekutiva Hospital Nacional Guido Valadares (HNGV) Cecelia Barros Mendonça hateten, durante ne’e sira seidauk hasai funsionáriu permanente sira ne’ebé servisu iha HNGV hodi hatama fali funsionáriu foun.

Nia dehan, públiku kestiona katak Ministériu Saúde hasai hotu tiha pesoál saúde sira ne’ebé servisu tinan naruk iha HNGV no hatama fali ema foun ba servisu, maibé realidade lahanesan saida maka públiku kestiona.

“Ami seidauk hasai pesoál saúde sira ne’ebé servisu durante tinan naruk iha ne’e, sira-ne’e hanesan dotór, enfermeiru, espesialista, parteira no tékniku sira hotu to’o agora ami sei servisu hamutuk ho sira, tanba ne’e públiku kestiona katak ami troka ema sira-ne’e, ida ne’e laloos,” nia afirma iha nia servisu fatin HNGV, Bidau, Díli.

Nia hatutan, pesoál saúde sira ne’ebé mak servisu tinan barak iha HNGV ne’e sei nafatin servisu hela, tanba ema sira-ne’e iha esperiénsia barak ona.

“Ministériu Saúde hapara sira ne’ebé kontratu iha tinan kotuk ne’e loos, tanba sira-ne’e kontratu remata ona, tanba ne’e sira-ne’e hapara tuir kontratu ne’ebé iha, maibé funsionáriu permanente sira Ministériu Saúde la hapara sira.

Iha parte seluk, Komisáriu Komisaun Funsaun Públika (KFP), Agapito da Conceição hateten, funsionáriu permanente sira-ne’e servisu iha instituisaun públika ne’e kompeténsia Komisaun Funsaun Públika.

“Komisaun Funsaun Públika mak iha kompeténsia atu haree ba funsionáriu permanente sira no ajente administrasaun públika sira hotu kona-ba sira ne’ebé servisu kontratadu ida-ne’e kompeténsia instituisaun idak-idak nian ne’ebé sira presiza atu bele kompleta sira-nia servisu, la'ós (KFP) nia kompeténsia, tanba ne’e públiku kestiona katak Ministériu Saúde troka tiha funsionáriu permanente sira no tau fali ema foun ba servisu ida la'ós,” nia dehan.

Nia hatutan, funsionáriu permanente sira ne’ebé servisu iha instituisaun sira-ne’e kompeténsia iha KFP nian, la'ós kompeténsia instituisaun nian, tanba ne’e instituisaun ida labele naran hasai funsionáriu permanente ida bain hira la iha koñesimentu husi funsaun públika.

Nia salienta, públiku kestiona makaas katak, HNGV troka hotu funsionáriu permanente ida-ne’e informasaun la'ós, tanba to’o agora funsionáriu permanente sira sei nafatin servisu iha ne’e, tanba ne’e husu ba públiku atu labele halo krítiku bainhira la iha evidénsia ruma.