Ambulánsia 28 Sei Entrega Ba Patrimóniu Estadu Tanba Kondisaun Aat

Diretór Jeral Servisu Nasional Apoiu EmerjénsiaMédiku (SNAEM), Simplicio Amaral, hateten ambulánsia rua 28 sei intrega ba Patrimóniu Estadu, tanba ambulánsia sira kondisaun aat ona.

Nia dehan, ambulánsia sira-ne'e sei entrega fali ba Patrimóniu Estadu, tanba ambulánsia sira ne'e kondisaun at ona la bele atu uza, tanba ne'e sei intrega fali hodi hola fali ambulánsia foun atu nune’e bele hodi halo atendimentu ba pasiente sira ne’ebé iha munisípiu ne'e ho di'ak.

"Ita durante ne'e iha ambulánsia 50 mak kobre iha territóriu nasional, maibé husi ambulánsia hirak ne'e agora dadaun ita iha deit ambulánsia 24 mak sei di’ak, no 28 mak la di’ak ona," nia hateten iha Salaun CNE Kaikoli, Díli.

Nia esplika iha munisípiu balun ambulánsia ida de'it mak kobre, tanba ne'e la sufisiente hodi evakua pasiente sira ba mai iha fasilidade Saúde sira.

Nia informa, ambulánsia 28 ne'ebé at ne'e, agora dadaun SNAEM alista ona no tempu badak sei intrega ba iha Patrimóniu Estadu, tanba ambulánsia sira ne'e labele hadia ona.

Iha parte seluk, Akademista UNTL Deonizio Cabral hatete, ambulánsia ne'ebé aat ona di'ak liu entrega tiha ba Patrimóniu Estadu hodi hola foun fali.

“Ambulánsia 28 ne'ebé dehan aat ona ne'e di'ak liu troka kedas, tanba ambulánsia ne'e importante ba povu," nia dehan.

Nia dehan, ambulánsia sira-ne'e dalaruma balun besik tinan 10 ona, balun tian 20 ona maibé governu ida tun governu ida sa'e hanesan de'it, sentru saúde sira iha munisípiu nafatin uza kareta ambulánsia aat sira-ne'e, tanba ne'e presiza duni atu tau matan ba problema sira-ne'e.