Quinta, Julho 18, 2024

Komandu Falintil-Forsa Defesa Timor-Leste (F-FDTL) no Polísia Nasionál Timor-Leste (PNTL) implementa rezolusaun governu nian hodi lansa operasaun konjunta hodi prepara ba asegura seguransa ba vizita Santo Padre Amo Papa Francisco iha Timor-Leste.

Komandu Falintil-Forsa Defesa Timor-Leste (F-FDTL) no Polísia Nasionál Timor-Leste (PNTL) implementa rezolusaun governu nian hodi lansa operasaun konjunta hodi prepara ba asegura seguransa ba vizita Santo Padre Amo Papa Francisco iha Timor-Leste.

Xefe Estadu Maiór Jenerál F-FDTL, Tenente Jenerál Domingos Raul "Falur Rate Laek," dehan, operasaun konjunta ne’ebé realiza entre forsa komandu rua ne'e bazeia ba rezolusaun governu nian ne’ebé mak hatun ona no orienta komandu F-FDTL no PNTL hodi fó seguransa ba vizita Santu Padre.

"Liuhusi rezolusaun ne'e komandu F-FDTL no PNTL envolve mós komponente hotu iha Timor-Leste lansa operasaun konjunta hodi prepara asegura seguransa ba vizita Santo Padre Francisco durante iha Timor-Leste," nia informa iha knaar fatin Fatuhada,Díli.

Nia dehan, antes lansa operasaun konjunta ne'e forsa komamdu rua ne'e tuir ona sosializasaun kona-ba operasaun konjunta, tanba ne'e husu nafatin joventude Timor-Leste atu sai juventude ne’ebé mak edukadu no sivilizadu.

"Santo Padre mai Timor ne'e mundu tomak sei akompaña no mai laos intensaun atu reza deit, tanba ne'e husu ba joventude sira tenke hatudu disiplina no organizadu," Tenente Jeneral Domingos Raul Falur Rate-Laek informa.

Nia dehan, lori forsa armada nia naran no komandu PNTL apelu ba públiku katak, envolve seguransa, la koñese ema ida, atu boot ka kiik ema hotu mak tenki koñese seguransa, tanba ne'e atu se de’it komponente hotu iha Timor-Leste, tantu organizasaun no instituisaun saida de’it nia responsabilidade koletivu.

Iha fatin hanesan, Komandante Jerál PNTL, Komisáriu Henrique da Costa, lansa operasaun konjunta ne'e hodi prepara ekipa traballu hodi responde ba rezolusaun governu nian kona-ba vizita Santo Padre nian.

"Komandu rua ne'e servisu hamutuk prepara ekipa traballu ida hodi kria tarefa, tanba atividade barak sei halo liu-liu iha prevensaun nian no operasaun atu garante seguransa ho hakmatek," nia informa.

Nia hatutan, sei instala sentru komandu kontrolu koordenada nian iha PNTL no forsa rua ne'e hamutuk halo aprezentasaun iha Nasional nian ne’ebé lideradu husi Segundu Komandante Jerál Komisariu Pedro Belo no Komandante Komponente Navál, Komodoro Higino das Neves mak lidera operasaun konjunta.