PNTL Lansa Operasaun Espesífiku ba Área Risku

Polísia Nasionál Timor-Leste (PNTL) liuhusi Komandu Polísia Munisípiu Díli lansa operasaun espesífiku hodi kontrola no halo prevensaun iha área risku ba konflitu iha kapital Díli.

Komandante PNTL, Munisípiu Díli, Superientendente Xefe Orlando Gomes dehan, operasaun Munisípiu Díli hamutuk ho ekipa konjunta halo operasaun iha tempu kalan liu-liu iha área sira ne’ebé mak identifika ona risku ba konflitu iha kapital Díli.

"Operasaun Espesífiku ne'e husi ekipa konjunta kompostu husi Unidade Espesial Polísia, Unidade Polísia Marítima, inklui komandu Taksforce sira, hodi kontrolu área hirak ne’ebé risku," nia salienta.

Nia dehan, operasaun konjunta ne'e utiliza kareta no balun lao ain hodi kontrola no halo prevensaun ba área risku ba konflitu.

"Esforsu para intensiva Patrullmentu iha fatin sira ne’ebé mak ita identifika, ne'e hodi prevensaun ho fó seguransa ba komunidade nia movimentu seguru," Komandante Gomes informa.

Enkuantu nia dehan, komandu mós orienta ona ba unidade tránzitu sira atu ativa iha tempu kalan, hodi halo auto stop no check point no halo sweping ba fatin sira ne’ebé mak ema halo movimentu barak, tanba kalan ne’e haree iha área barak ne’ebé mak sempre uza motorizada kanu-resin hodi halo barullu no alerta ba membru sira atu atua.

Entretantu, Komunidade Elizio Fernandes dehan, operasaun ne’ebé polísia sira realiza ne'e kontribui tebes ba situasaun Díli hakmatek.

"Bainhira ita haree prezensa polísia iha bairu, suku no dalan públiku sira halo ema hotu sente hakmatek no halo movimentu mós seguru," nia hatete.

Tanba ne'e nia dehan, prezensa Polísia nian iha komunidade nia leet ne’e importante tebes hodi halo prevensaun ba konflitu no kria sidade ne’ebé hakmatek no seguru ba ema hotu ne’ebé hela iha sidade Díli.