- Publika iha: 26 Julho 2024
Vise Primeiru-Ministru Nova Zelándia, Winstons Peters dehan, nia governu komprometidu atu kontinua fó apoiu Timor-Leste, liu-liu iha área edukasaun no turizmu, tanba identifika katak kontribui tebes ba ekonomia iha Timor-Leste.
"Ita prontu apoiu dezenvolvimentu Timor-Leste nian, liu-liu hasae ekonomia, tanba ne'e ita presiza investe no apoiu uluk iha área edukasaun no turismu, tanba área rua ne'e kontribui tebes ba ekonomia Timor-Leste iha futuru," nia informa.
Nia dehan, Timor-Leste ho Nova-Zelándia hanesan paíz rua ne’ebé belun di’ak no iha ligasaun ne’ebé forte dezde dékada tolu ka haat ba kotuk.
"Alende ita apoiu iha área edukasaun no turizmu, ita mós apoiu Timor-Leste nia adezaun bá ASEAN liuhusi asesu ba formasaun lian Inglés no formasaun sira seluk ne’ebé bele tulun hodi hasa’e abilidade no koñesimentu Timoroan sira-nian,” nia salienta.
Iha fatin hanesan, Vise-Primeiru-Ministru Asuntu Ekonómiku no Ministru Turizmu no Ambiente, Francisco Kalbuadi Lay, dehan desde uluk kedan Nova-Zelándia apoia Timor-Leste iha área sira importante ba dezenvolvimentu umanu no ekonómiku.
“Uluk kedas governu Nova-Zelándia apoiu ona ita liuhusi área kapasitasaun rekursu umanu, nune’e mós iha área defeza,” nia dehan.
Tanba ne'e nia dehan, ba oin Timor-Leste sei esplora liután kooperasaun ho Nova-Zelándia hodi bele apoia dezenvolvimentu Timor-Leste iha área ekonomia.
"Ita sei kontinua servisu hamutuk atu bele dezenvolve iha área hirak ne’ebé mak kontribui duni ba hasa'e kresimentu ekonomia Timor-Leste nian iha futuru," nia informa.