- Publika iha: 13 Outubro 2023
Xefe departamentu Psikiatria, iha Hospital Nacional Guido Valadares (HNGV), Díli, Doutór Boaventura José da Costa informa iha fulan Jullu até Setembru tinan 2023, sira rejista kliente tenta oho aan hamutuk na’in 10. Maioria problema família no ekonomia sai kauza prinsipál ba asaun tenta oho aan.
Nia dehan kliente sira-ne’e baixa iha sala internamentu hodi hetan tratamentu psikoterapia no medikamentu mínimu semana ida no másimu loron 14.
“Sira-ne’e hotu alta tiha ona, depois mak mai konsulta, tanba nia prosesu mak sira tenke mai check up atu ita fó konseling para labele repete tan.
Sira barak liu mak asaun ne’e halo ba dala rua, tanba problema família no ekonomia,” nia hateten iha servisu fatin Bidau, Díli.
Nia hateten iha períodu fulan tolu ne’e, kliente moras mental hamutuk na’in 86 mak baixa iha sentru internamentu acute care, tanba ho kondisaun skizofrenia katak grave presiza atendimentu psikoterapia no medikamentu atu ajuda estabiliza emosaun.
Nai hatutan kliente sira-ne’e maioria ho idade reprodutiva katak idade tinan 15 até 49 kompara ho grupu idade seluk.
Nia haktuir tratamentu ne’ebé sira oferese ba kliente sira mak konseling, psikoterapia no medikamentu, entau durante fulan tolu ne’e medikamentu sufisiente hela atu fo tratamentu.
Iha parte seluk, família kliente moras mental, Silvia Varela hateten servisu atendimentu iha sentru acute care di’ak tebes, tanba durante semana ida akompaña alin halo tratamentu di’ak.
“Durante semana ida tratamentu iha ne’e di’ak, médiku no enfermeiru sira mós atende alin ho di’ak tebes tanba ne’e, agora alin nia kondisaun di’ak, sira haruka fila ba uma ona. Maibé tenke hemu aimoruk rutina,” nia hateten.
Nia dehan aimoruk ba moras mental nian sufisiente hela, tanba ne’e durante baixa profesionais saúde sira la fó reseita ba família atu sosa.
Nia apela ba komunidade, liu-liu família ne’ebé iha membru família ruma moras mental labele abandona. Maibé lori ba fasilidade saúde sentru acute care atu hetan tratamentu ne’ebé dignu atu sira bele rekupera fila fali.