- Publika iha: 05 Agosto 2024
Vise-Primeiru-Ministru (VPM) no Ministru Koordenadór ba Asuntu Sosial, liuhusi Inter-ministerial Task Force For Social Affrairs (IMTSA) organiza grupu traballu tékniku ba asuntu sosiál hodi diskute kona-ba nutrisaun no seguransa alimentár.
Reprezentante VPM, Crhistopher Henry Samson hateten, koordena ho grupu traballu sira ne’ebé hareeekona-ba mal-nutrisaun no seguransa alimentár atu mai fahe ida-idak nia esperiénsia kona-ba oinsá atu bele kombate mal-nutrisaun ne’ebé sa'e makas iha Timor-Leste.
“Liuhusi diskusaun ida-ne’e, oinsá atu ita bele redús mal-nutrisaun iha tinan tolu nia laran, tanba programa ne’e kona-ba rais badak ne’e. Programa ne’ebé mapa tiha ona ho tempu ne’ebé naruk, tanba ne’e ita halibur grupu sira-ne’e mai hamutuk atu bele fó hanoin ba malu oinsá estadu bele halo hodi kombate mal-nutrisaun no seguransa alimentár mós oinsá ita bele promove di'ak liu ai-han lokál sira ne’ebé ita iha maibé ema la konsumu tanba la iha koñesimentu ne’ebé di'ak,” nia dehan hafoin abertura ba workshop kona-ba nutrisaun no seguransa alimentár iha salaun JL-Vila, Fatuhada Komoro, Díli.
Nia hatutan, problema mal-nutrisaun ne’ebé kada tinan sempre aumenta hela de'it, tanba ne’e liuhusi diskusaun ne’e bele fahe hanoin no fó rezultadu ne’ebé di'ak ba estadu Timor-Leste hodi bele rezolve problema ida ne’e durante iha tinan tolu nia laran.
Grupu sira-ne’e hamutuk hodi halo diskute kona-ba atu kombate mal-nutrisaun no seguransa alimentár mak hanesan Ministerio Saúde, Ministériu Agrikultura, Pekuaria Peskas, Florestas, Ministériu Solidaridade Sosial no Inkluzaun, Ministériu Juventude Desportu Arte Kultura, Ministériu Edukasaun, INDDICA, KONSSANTIL no ajénsia internasionál sira hanesan, Unicef, WFP, WHO, Uniaun Europeia, USAID, ADB, Banku Mundial no ONG nasionál sira.
Iha fatin hanesan, Diretora Nasional Nutrisaun Rosye Bela da Silva hateten, diskusaun ne’e oinsá atu hareee ba prioridade servisu Ministériu Saude husi parte nutrisaun espesífiku nomós husi parte nutrisaun sensivel oinsá atu bele hareee no hadia fila fali planu sira-ne’e hodi hareee ba mal nutrisaun.
“Iha diskusaun ida-ne’e oinsá ita atu haree fila fali ita-nia asaun planu ita atu kria fali planu ida ne’ebé atu implementa iha tempu badak iha tinan ida nia laran,” nia dehan.
Nia salienta, kada ministériu hato’o ida-idak nia planu oinsá atu bele kombate mal-nutrisaun iha rai laran, ida-idak fokus ba nia planu ikus tau hamutuk hodi hato’o ba estadu oinsá atu bele implementa programa sira ne’e iha tinan tolu nia laran.