- Publika iha: 21 Setembro 2024
Diretór Departamento de Comunicação Social (DCS) Roberto da Costa Pacheco hateten, estudante sira presiza aumenta liután sira-nia abilidade liuliu iha prátika, tanba ne’e departamentu realiza formasaun atu eleva sira-nia koñesimentu iha área jornalizmu nian kona-babáziku uza kámera hodi foti imajen no video.
“Formasaun bázika ida-ne’e ba estudante sira, la signifika katak estudante hosi Comunicação Social la kompriende di’ak kona-ba utilizasaun kámera no seluk tan, maibé formasaun ne’e halo ho intensaun atu hasa’e estudante sira-nia koñesimentu iha área jornalizmu nian liuliu oinsá uza kámera foti imajen no video iha terenu,” dehan Diretór Pacheco iha Kampus Kaikoli, Díli.
Nia salienta, hosi formasaun ida-ne’e bele hariku liután koñesimentu ne’ebé entudante sira hetan ona iha aula inklui prátika sira ne’ebé liu ona no oinsá prepara sira ba sira-nia futuru.
“Kada tinan Departamento de Comunicação Social sempre mantein komunikasaun ho profesór sira iha rai-li’ur, liuliu profesór Abílio Fonseca ne’ebé hanesan formadór, hakarak fahe nia matenek ba estudante sira iha ne’e (DCS).
Ha’u hanoin ida-ne’e buat ne’ebé mak importante tebes, no agradese ba laran luak ne’e, tanba husi formasaun ne’e maka bele hariku estudante sira-nia koñesimentu iha área jornalizmu nian,” dehan Diretór.
Abílio Fonseca Soares nu’udar formadór hateten, formasaun ne’e ho nia foku ba video kamera bázika ba estudante na’in lima-nulu (53) hosi Departamento de Comunicação Social.
“Ha’u-nia inisiativa rasik servisu hamutuk ho DC Siha UNTL, tanba ha’u iha hanoin ida katak estudante sira iha ne’e mesak ema potensiál hotu, ida-idak ho nia talentu, oinsá mak ema sira hanesan ami ne’ebé maka hetan oportunidade edukasaun iha rai-liur (University of Technology Sidney), oinsá ami-nia konsénsia atu mai fahe fali, atu ita hotu hamutuk hodi dezenvolve área media ne’e,” Formadór Fonseca dehan.
Nia hateten, parte importante formasaun ne’e maka atu partisipante sira bele hatene utiliza ekipamentu media nian, no estudante sira bele hatene kle’an liu maneira entrevista no uza kámera foti imajen no video.
Adelina Xavier Menezes nu’udar estudante iha DCS hateten, nia hakarak aproveita oportunidade refere hodi tuir formasaun, tanba ajuda tebes sira iha terenu.
“Ami kontente tebes, tanba esperiénsia husi ami-nia formadór partilla,bele apoiu ami kona-ba maneira halo operasaun kámera video nian no ida-ne’e ajuda tebes ami, atu ami tun ba terenu ami prátika kedas no ida-ne’e sai hanesan referénsia ida mai ami hodi aumenta ami-nia koñesimentu,” nia hakotu.