- Publika iha: 16 Setembro 2024
Prezidente Autoridade Munisípiu Díli (PAM-Díli), Gregório da Cunha Saldanha husu ba komunidade sira ne’ebé hela iha kapitál Díli, atu soe fo'er iha tempu kalan, loron labele soe fo'er.
Nia dehan, Prezidenti Autoridade Munisípiu Díli, halo tan ona karta sirkulasaun ida, husu komunidade sira ne’ebé hela iha Munisípiu Díli, atu labele soe fo'er iha tempu loron, tenke soe fo'er iha tempu kalan, atu nune’e kompañia sira ne’ebé responsável ba ra'ut fo'er iha Munisípiu Díli bele ra'ut dala ida de'it.
“Karta sirkula ida-ne’eAutoridade Munisípiu Díli mak hasai tan ne’e, atu husu ba komunidade sira, atu labele soe fo'er iha tempu loron, maibé tenke soe fo'er iha tempu kalan, atu nune’e kompañia sira ne’ebé responsável ba ra'ut fo'er ne’e, bele ra'ut dala ida de'it, se lae sira mai ra'ut mós tiha, komunidade sira lori fo'er mai soe fali de'it, tanba ne’e husu ba komunidade sira atu soe fo'er karik tenke soe iha tempu kalan,” nia hateten hafoin enkontru remata ho ekipa nasionál ba vizita Amu Papa, iha Motael, Díli.
Nia hatutan, atu rezolve problema lixu iha Munisípiu Díli ne’e susar, maibé liuhusi karta ne’e Autoridade Munisípiu Díli fó sai ona no agora fó sai tan, fiar katak komunidade sira balun komesa komprende no halo tuir, maske komunidade balun mak seidauk halo tuir, tanba ne’e husu ba autoridade lokál sira atu fó hanoin ba komunidade sira atu nune’e bele soe lixu iha tempu loron.
“Ami mós husu ba autoridade local sira, atu fó hatene ba komunidade sira atu soe fo'er iha tempu kalan, labele soe fo'er iha tempu loron,” nia informa.
Iha fatin seluk, komunidade Suku Kaikoli, Mariano dois Reis Pinto hateten, lixu fatin iha Suku Kaikoli ne’e iha fatin tolu ou haat de'it mak iha, entaun komunidade balun lixu fatin ne’e dook husi sira, entaun dala ruma loron mak sira lori ba soe.
“Lixu fatin iha Kaikoli ne’e ladún barak, ita haree de'it husi kampus UNTL sa'e mai to’o Merkadu Lama ne’e lixu fatin la iha, entaun ida-ne’e difikulta tebes komunidade sira atu soe fo'er, entaun komunidade balun tenke soe fo'er iha tempu loron,” nia dehan.
Nia hatutan, atu rezolve problema lixu iha Díli ne’e di'ak mak rezolve uluk lai fatin lixu iha kada bairu, se lae mak la bele rezolve, tanba fatin lixu la iha ne’e oinsá mak bele rezolve lixu.
“Komunidade sira-ne’e soe lixu arbiru, tanba lixu fatin la iha, lori mai naran soe de'it, entaun ida ne’e problema, tanba ne’e rezolve tiha lai fatin lixu kada bairu sira depois mak ita organiza fali komunidade oinsá atu bele soe lixu,”nia salienta.