- Publika iha: 25 Setembro 2024
Vise-Primeiru-Ministru, Ministru Koordenadór Asuntu Sosiais, Ministru Dezenvolvimentu Rurál no Habitasaun Komunitária, Mariano Assanami Sabino hateten, Timor-Leste iha hahan nutritivu barak hanesan fehuk midar, talas, ai-farina, batar kairala, kumbili no seluk tan, maibé sosiedade mak seidauk iha koñesimetu atu konsumu ai-han sira-ne’e.
Nia dehan, ai-han nutritivu barak, tanba ne’e presiza iha kampaña atu ema hotu iha koñesimentu ba konsumu ai-han nutritivu ho di'ak.
"Atu komunidade bele iha koñesimentu atu oinsa konsumu ai-han sira hanesa fehuk midar, ai-farina, batar kairala, kumbili noseluk tan, ne’e presiza ministériu hotu tenke servisu makaas hodi halo kampaña, atu nune’e bele hasae ema nia koñesimentu, entaun presiza Ministériu Saúde sei harii klinika ba inan isin-rua no ba bebé, konsensializa inan sira fó susu ba oan, no prepara hahan nutritivu ba oan sira no ba Ministériu Obras Públika nian sei haree ba dezenvolvimentu bee-moos, nune’e mós ministériu sira seluk ho ninia papél rasik," nia esplika.
Nia hatutan, bainhira ministériu hotu servisu ona tuir idaidak nia papél, fiar katak sosiedade sira bele komprende ona oinsa atu bele konsumu ai-han lokál sira, tanba koñesimentu komunidade sira-nian, kona-ba konsumu ai-han lokál sira-ne'e ho maneira ne'ebé baibain sira uza ona.
Iha fatin hanesan, Diretór Ezekutivu Unidade de Missão para o Combate ao Stunting (UNMICS), Joel Maria Pereira hateten, atu hatun malnutrisaun ne'e fila fali ba papél liña ministériu sira hotu, atu oinsa bele hala’o idaidak nia servisu nomós parseiru dezenvolvimentu hotu.
"Ita halo tratamentu saúde prepara fasilidade saúde, ita esforsu atu promove inan nia susu been ba labarik sira, ita mós iha fasilidade saúde, ita mós halo promosaun saúde barak maibé kuandu la iha ai-han ne'ebé adekuadu no nutritivu, mak ita sei la bele rezolve problema sira-ne'e hotu, tanba ita hotu tenke servisu makaas atu nune’e bele fahe informasaun ba sidadaun sira hotu atu oinsa bele prepara hahan nutritivu sira ho di'ak, " nia afirma.
Nia esplika, ai-han nutritivu iha Timor ne'e barak tebes, maibé ema barak seidauk iha koñesimentu oinsa bele prepara ai-han sira ho di'ak bainhira atu konsumu, entaun buat sira hanesan ne'e presiza kontribuisaun husi liña ministériu sira hotu, atu bele servisu tuir idaidak nia papél, nune’e bele fahe informasaun ba komunidade sira, oinsa bele konsumu ai-han nutritivu sira ne'e ho di'ak.