- Publika iha: 16 Julho 2024
Reitór Universidade Nacional Timor Lorosa’e (UNTL), Dr. João Soares Martins dehan, konfrontasaun entre joven Timoroan sira iha Santuáriu Fátima Portugal, iha Portugal, hatun imajen Timor-Leste nian iha mundu.
Nia hatete, hahalok vandalizmu ne'ebé mak joven sira halo ne'e ema la temi sira-nia naran maibé, sira temi mak Timor-Leste nia naran no sira konsegue estraga ona imajen nasaun nian no bele fó impaktu mós ba servisu no koperasaun entre nasaun rua ne’e.
"Konfrontasaun ne'e hatun imajen Timor-Leste nian iha mundu, no bele fó impaktu ba servisu koperasaun no investimentu iha Timor-Leste," nia hatete.
Nia dehan, haree aktu ne'e ema hotu triste tebes, tanba ne'e lori imajen nasaun nian, no imajen ladiak ho sinal hatun kedas imajen Timor-Leste nian iha ema nia rain.
Reitór husu ba Estadu Timor-Leste tenke kopera ho Estadu Portugal liuhusi Embaxada atu bele buka solusaun ba problema ba konfrontasaun ne’ebé akontese iha Santuáriu Fátima iha Portugal ne'e tanba lori impaktu la di’ak mai Timor-Leste.
Entretantu, Diretór Jerál Asuntu Bilaterál Amerika, Europa, no Afrika, Fransisco Deonisio Fernandes dehan, Ministériu Négosiu Estranjeiru no Kooperasaun (MNEK) fó konfiansa tomak ba autoridade Portugal nian hodi atua problema ne’ebé Timoroan sira halo iha ne'ebá.
Nia dehan, problema ne’ebé joven sira halo iha Portugal ne'e Autoridade Portugal detein ona balun hodi kontinua prosesu investigasaun no balun husik fila fali ba uma.
"Konfrontasaun ne’ebé akontese iha Santuáriu Fátima Portugal ne'e aktu indíviduu no la reprezenta nasaun Timor-Leste," nia salienta.
Nia dehan, maské situasaun ne'e envolve Timoroan iha Portugal, maibé parte MNEK fiar katak relasaun bilaterál entre Timor-Leste ho Portugal kontinua di’ak no la impaktu ba investimentu iha rai laran.
"Buat hotu ita entrega ba ita-nia pais maun alin (Portugal) mak haree. Husi ita-nia parte mak oinsá atu kolabora didiak ne'e la’ós asuntu bilateral," DJ MNEK Fernandes dehan.
Diretór ne’e husu ba Timoroan sira ne’ebé buka moris iha Portugal tenke hakmatek no respeita lei no regulamentu sira no haree malu hanesan maun alin, la’ós inimigu.
Enkuantu kona-ba deporta fila Timoroan sira ne’ebé mak halo konfrontasaun, ne’e depende ba rezultadu husi investigasaun karik deporta fila sira sei kontaktu fali mai husi Embaixada Timor-Leste iha Lisboa, Portugal.