- Publika iha: 13 Setembro 2024
Estrada iha Suku Liaruka Postu Administrativu Ossu Munisipiu Viqueque kondisaun grave, tanba ne'e obriga família tenke hulan inan feton ida ne'ebé grávida besik atu partus hodi lori ba Sentru Saúde Ossu.
Diretór Servisu Saúde Munisípiu (SSM) Viqueque Dr. Aljaksono Soares Maia hateten, estrada iha suku Liaruka nia kondisaun aat, bainhira udan tau karreta ho motorizada labele tama, tanba ne’e iha tempu udan komunidade balun moras iha ne'ebá, entaun komunidade koopera ho pesoál saúde hodi hulan de'it moras ne'e to'o estrada, atu nune'e ambulánsia bele tula ba sentru saúde Ossu.
"Estrada iha Suku Liaruka ne'e la di'ak duni, bainhira udan tau karreta ba la di'ak, tanba ne'e foin lalais akontese ita-nia inan feton grávida ida ne'ebé besik atu partus família hulan de'it hodi mai halo tratamentu, momentu ne'ebá pesoál saúde sira iha sentru saúde Ossu hodi duni karreta bombeirus ida mak ba, tanba karreta ambulánsia iha Sentru Saúde Ossu ne'e avaria hela entaun pesoál saúde sira koopera ho karreta bombeirus mak ba hasoru sira.
Karreta bombeirus ne'e mós ba la to'o iha ne'ebá, tanba to'o de'it iha dalan klaran karreta mout tiha, entaun família sira koopera ho pesoál saúde sira, hulan inan feton ne'e to'o mai iha karreta bombeirus mout ba ne'e depois mak ambulánsia ida husi Sentru Saúde Baucau mak tula lori liu kedas ba iha Baucau," nia esplika liuhusi via-telefone.
Nia hatutan, momentu família hulan inan feton grávida ne'e mai, pesoál saúde ida husi postu saúde Liaruka mak akompaña, tanba ne'e kooperasaun família sira ho pesoál saúde di'ak.
Iha fatin seluk reprezentante Prezidenti Autoridade Munisípiu Viqueque, Luis Antonio da S. Soares hateten, kondisaun estrada iha Munisípiu Viqueque ne'e maioria kondisaun aat duni, tanba ne'e difikulta tebes komunidade sira atu asesu ba saúde.
"Problema iha Munisipiu Viqueque ne'e la'ós de'it estrada, maibé iha sentru saúde sira mós ambulánsia ida de'it, bainhira ambulánsia ne'e aat tiha, entaun ita atu lori saida mak ba tula ita-nia komunidade sira-ne'e, entaun komunidade sira tenke hulan de'it ema sira ne'ebé moras todan mai ospital, hanesan foin lalais komunidade hulan de'it inan feton grávida ida ne'ebé besik atu partus mai ospital," nia dehan.
Nia hatutan, nu’udar PAM-Viqueque nian sei servisu makas atu bele normaliza lalais estrada sira-ne'e, tanba estrada iha Munisípiu Viqueque ne'e husi estrada nasional to'o lokál sira-ne'e kondisaun aat barak, tanba ne'e mak PAM Viqueque komesa ona buka estratéjiku hodi hadia estrada sira-ne'e.