- Publika iha: 13 Agosto 2024
United States Agency for International Development (USAID) uza ona orsamentu ho montante millaun $17.2, hodi hametin atividade sustentabilidade sistema saúde iha Timor-Leste ba futuru.
"Estadus Unidus nafatin dedikadu atu responde ba dezafiu dezenvolvimentu Timor-Leste nian liuhusi hasa'e kapasidade umanu, habelar dezenvolvimentu forsa traballu, no hametin governasaun no sustentabilidade saúde nian iha Timor-Leste ba Futuru," dehan Enkaregadu Negósiu Embaxada EUA, Marc Weinstock, iha Hotel Timor, Díli.
Enkaregadu Negósiu Embaxada EUA hateten, atividade ne’e ho inisiativa hala’o ona papél importante hodi hametin Timor-Leste nia Sistema Saúde ba futuru ne’ebé sustentável no auto-finansiadu.
"Atividade susesu husi Sistema Saúde USAID nian hetan liuhusi kolaborasaun besik ho Ministériu Saúde, parseiru dezenvolvimentu, FONGTIL, lider komunitáriu no membru komunidade sira," nia hatutan.
Nia relata, orsamentu millaun $17.2 ne’ebé lansa iha tinan haat liu ba kotuk ne’e, hodi apoia ba estabelesimentu Unidade Finansiamentu Saúde, hadia prosesu foti desizaun ne'ebé bazeia ba dadus iha munisípiu 13, dezenvolve deskrisaun servisu no manuál avaliasaun dezempeñu, estabelesimentu padraun kompeténsia no kódigu étika ba médiku sira, haluan monitorizasaun saúde komunitária liuhusi assembleia saúde suku, Apoiu kriasaun Rede Ba Saúde Timor-Leste (REBAS-TL), no Administra vasina COVID-19 liu doze 80,000.
Vise-Primeiru-Ministru, Ministru Koordenadór Asuntu Sosiál, Ministru Dezenvolvimentu Rural no Habitasaun Komunitaria, Mariano Asanami Sabino, hateten durante 2019 governu America ajuda Timor-Leste iha área lubuk ida, tanba ne’e governu Timor-Leste la haluha agradese ba Governu America ne’e fó ona kontribuisaun barak liuliu iha área saúde.
“Ita labele haluhan katak durante tinan 2019 governu America liuhusi USAID ninia programa ba sustentabilidade Sistema saúde ne’ebé hodi fo asistensia tekniku no finanseru ba Ministeriu Saúde no organizasaun sosidade sivil lubuk ida ne’ebé durante ne’e servisu iha seitor saúde liuliu foka ba fortalesimentu Sistema saúde iha nivel nasional nomós iha nivel munisípiu nian,” dehan Vise-Primeiru-Ministru.
Nia dehan, durante ne’e governu Timor-Leste halo ona buat barak, maibé tenki hanoin katak Timor-Leste sei bele rezolve objetivu dezenvolvimentu sustentável hodi hadia saúde diak no bens estar ida ne’e seidauk bele rejolve, tanba hareeba problema lubuk ida ne’ebé Timor-Leste sei nafatin enfrenta.