Komunidade Barak Mak La Kolabora Ho Veterináriu Hodi Halo Vasinasaun Ba Asu

Veterináriu Rejiaun Administrativa Espesiál Oé-cusse Ambeno (RAEOA), Dotór Brito de Araujo hateten, komunidade balun iha rejiaun espesiál Oe-Cusse balun lakohi kolabora ho veterináriu hodi halo vasinasaun ba asu.

“Komunidade barak mak lakohi kolabora ho ita atu halo vasina ba sira-nia asu, tanba ne’e mak susar boot ba ita atu halo intervensaun ba surtu ida-ne’e, tanba komunidade sira ho razaun katak problema ne’e hanesan ho problema iha tinan kotuk liu ba hanesan Covid-19 ne’e,” nia dehan liuhusi telefone.

Nia hatutan, komunidade sira ne’ebé lakohi halo vasinasaun ba asu tanba sira dehan moras ne’e bosok, hanesan foin lalais iha tinan kotuk dehan kovid-19 ne’e, balun lakohi vasina asu tanba, ema balun ba bosok sira dehan, bainhira asu ne’e hetan ona vasina sei aumenta si'ak liu tan, entaun liuhusi informasaun sira ne’e mak komunidade sira ne’e lakohi halo vasina saun ba sira nia asu.

Iha parte seluk, Sekretáriu Saúde Rejional Oé-Cusse Luis de Jesus Neno hateten, sira agora servisu hamutuk ho autoridade seguransa no autoridade lokál sira, hodi halo sensibilizasaun informasaun ba komunidade sira atu bele halo vasinasaun ba asu ne’ebé sira hakiak.

“Ami fahe informasaun ba komunidade sira atu halo vasinasaun ba sira-nia asu no ami fó hatene ba sira katak, bainhira asu siak tenke kesi tiha, labele husik ka di’ak liu oho tiha, maibé iha komunidade balun ne’ebé lakohi oho sira-nia asu no balun lakohi atu halo vasina ba sira-nia asu, tanba ne’e presiza informasaun atu bele hatene no kolabora,” nia haktuir.

Nia hatutan, atu prevene surtu rabies ne’e primeiru mak komunidade sira, tenke iha konsiénsia hodi halo kolaborasaun ho ekipa veterináriu no pesoál saúde sira nomós autoridade lokál, atu nune’e bele halo prevensaun ba asu ne’e, se komunidade mak lakohi koopera mak susar atu halo prevensaun ba moras rabies ne’e.