- Publika iha: 24 Setembro 2024
Vise-Primeiru-Ministru, Ministru Koordenadór Asuntu Sosiais, Ministru Dezenvolvimentu Rurál no Habitasaun Komunitária, Mariano Assanami Sabino husu, ba pesoál saúde sira ne’ebé servisu iha Hospital Nacional Guido Valadares (HNGV) atu trata pasiente sira ho di’ak no profisional.
Nia dehan, pesoál saúde sira ne’ebé HNGV tenke servisu tuir professionál hodi atende pasiente sira, atu nune’e pasiente sira-ne’e bele senti seguru bainhira ba halo tratamentu.
“Pesoál saúde sira tenke atende pasiente sira ho oin midar di’ak para atu bele servi pasiente sira ho didi’ak atu nue’e pasiente sira senti seguru bainhira sira haree atendementu iha Hospital Nacional Guido Valadares ho di’ak,” nia dehan hafoin remata esnkontru iha, salaun Ministériu Finansas, Aitarak Laran, Díli.
Nia hatutan, sei koalia hamutuk ho pesoál saúde sira iha HNGV atu oinsa sira bele servisu ne’e seguru no halo atendimentu ba pasiente sira mós di’ak.
“Ita sei mós sei koalia ho médiku sira, enfermeira, parteira, dotor sira no dotor espesialista sira, ita sei haree muda ituan polítika ne’e para atu oinsa fó seguru para bele servisu,” nia afirma.
Iha parte seluk, Diretór Servisu Apoiu Diagnóstiku no Terapeutiku iha HNGV dr. Vidal de Jesus Lopes hateten, loos duni katak dala ruma pasiente sira balun ladun seguru no la simu atendementu iha HNGV, tanba pesoál saúde balun halo atendimentu ba pasiente sira ho oin boot no siak.
“Pasiente sira balun la simu atendimentu husi pesoál saúde sira balun katak dala ruma halo atendimentu ho hirus de’it, oin boot ka siak, ida ne’e loos duni, tanba pasiente sira iha HNGV ne’e la’ós ema ituan, ema barak tebes.
Pasiente balun tama balun sai, balun mai halo de’it tratamentu, entaun pasiente balun hakarak atende uluk sira, ida-ne’e mak halo pesoál saúde sira la kontrola sira-nia emosaun entaun bele hasai linguajen ne’ebé la di’ak ba pasiente sira,” nia esplika.
Nia afirma, públiku kestiona kona-ba atendimentu husi pesoál saúde balun la di’ak, ida ne’e loos, tanba ne’e sira sei buka meiu oinsa mak bele hadaia problema sira-ne’e iha futuru.
“Problema ne’e pasiente balun kestiona kona-ba atendimentu husu pesoál saúde sira-ne’e loos, tanba ne’e ami komesa ona buka meiu oinsa mak bele hadia problema sira-ne’e, tanba ita mós hatene katak HNGV ne’e halo atendimentu loron ida-ne’e barak tebes, tanba ne’e dala ruma pesoál saúde sira hasai liafuan makaas ituan no hatudu oin hirus ituan, maibé buat sira-ne’e ami sei hadia,” nia salienta.