- Publika iha: 18 Junho 2024
Durante ezisténsia Unidade Polísia Marítima (UPM) nian, tinan 21 (2003-2024) ona, maibé kontinua menus rekursu umanu no materiál hodi kontrola atividade ilegál iha tasi.
Segundu Komandante Jeral PNTL, Komisáriu Pedro Belo dehan, durante ne'e UPM hala'o esforsu makaas hodi halo atuasaun ba atividade ilegál iha tasi, maské ho rekursu ne’ebé mak limitadu.
"Durante ne'e ita Unidade Polísia Marítima UPM menus rekursu umanu no materiál hodi fasilita ami-nia servisu kontrolu atividade ilegál no krime organizadu ne’ebé akontese iha tasi," nia dehan.
Nia dehan, atividade ilegál ne'ebé sempre akontese iha tasi mak tranzasaun ilegál, peska ilegál, nune'e mos halo salvamentu ba komunidade sira ne’ebé mak hetan dezastre iha tasi.
"Maské ita menus rekursu umanu no material, maibé durante ne'e ita sempre esforsu hodi kontrola tasi no konsegue halo aprensaun ba tranzasaun ilegál no halo intervensaun ba peska ilegál no ita salva ona komunidade na’in 9 ne’ebé hetan dezastre iha tasi laran," Komisáriu Belo salienta.
Nia husu ba governu atu tau prioriadade ba dezenvoliventu ba Polísia Nasional Timor-Leste (PNTL) liu-liu Unidade Polísia Marítima (UPM), hodi bele kompleta ekipamentu avansadu nune’e kontrola tasi no iha rekrutamentu membru foun mai tau mós prioridade ba UPM.
Enkuantu nia dehan, durante atividade kontrola tasi ne’e konsegue prende sasan ilegál hamutuk 78 no suspeitu sira submete ona ba prosesu no balun iha ona prizaun Bekora no balu liberta fali.
Entretantu, Ministru Minsitéio Interior (MI), Francisco da Costa Guterres dehan, dezenvolvimentu UPM tenke liga ba iha area tolu (3), mak prevensaun no kontrolu efetivu ba tasi hodi prevene atividade ilegál iha tasi, no buska, katak komunidade ne’ebé mak uza tasi ne'e UPM iha obrigasaun atu bele asegura no halo salvamentu.
“Unidade Polísia Marítima ne’e apoiu governu asegura ekomonia tasi nian, sira-nia papel importante iha estadu ida ne'e. Tanba ne’e ita rekoñese katak UMP enfrenta problema rekursu no ekipamentu tanba ne'e ita presiza kompleta no dezenvolve liga ho area tolu ne’ebé mak importante iha UPM nian servisu lor-loron," nia hatete.
Nia dehan, governu gradualmente kria kondisaun formasaun, rekrutamentu, infraestrutura no ekipamentu hodi bele dezenvolve UPM.
"Ita hakarak forsa ida ne'ebé mak profesional, modernizadu hodi bele hala'o servisu tanba problema hirak ne’ebé mak UPM hasoru ne'e governu sei rezolve fazeadamente maibé dadaun ne'e governu komesa rezolve ekipamentu balun ona,” Minitro Guterres akresenta.