- Publika iha: 16 Setembro 2024
Xefe suku Macalaco, Postu Administrativu Quelicai, Munisípiu Baucau Estevão Salomão Martins Belo, husu governu liu-liu Sekretáriu Estadu Arte no Kultura (SEAK) atu bele fó apoiu ruma ba uma-Lisan Tokeha iha suku Macalaco ne’ebé mak afeta ba dezastre naturais foin lalais.
Nia dehan, uma-lisan Tokeha ne'e anin sobu iha loron 24 fulan Juñu foin lalais,sasan ne’ebé iha umalaran mak sasán uma-lisan nian hanesan surik lulik, belak lulik inklui sasán dapur nian ne’ebé uza bainhira uza ba serimónia kulturál iha knua no hare lata rua-nolu no sasan seluk tan.
"Uma-lisan ne'e estragus husi anin boot, tan ne’e ami husu governu liuhusi Sekretariu Estadu Arte no Kultura atubele mai haree no fó apoiu ruma ba uma-lisan Tokeha ne’ebé hetan estragus ona," nia dehan.
Nia hatete, antes ne'e sira hato'o ona proposta ba Autoridade Protesaun Sivíl Munisípiu Baucau nian, maibé seidauk hetan resposta.
"Dadaun ne'e ami buka hela referénsia no dadus balun hodi halo proposta ba governu atu bele hetan netik apoiu balun.Tanba Uma-Lisan refere konstrui iha tinan 2006 no hetan dezastre iha dia 24 fulan Juñu foin lalais," Xefe Suku Macalaco Belo dehan.
Entretantu SEAK Jorge Cristovão da Costa hatete, iha IV governu ne'e programa apoiu konstrusaun uma-lisan ne'e orsamentu la iha.
"Dadaun ne'e ita la apoiu konstrusaun ba uma-lisan sira, maibé ita apoiu de’it ba iha inaugurasaun uma-lisan sira," nia informa.
Nia dehan, apoiu ba inaugurasaun ne'e mós, SEAK depende ba proposta ne'ebé mak husi uma lisan sira submete.