Inan Nia Esforsu Ba Oan Sira-Nia Futuru Liuhusi Soru Tais

Inan Casilda Moniz nu’udar soru na’in tais Timor iha Suku Labarai, Postu Administrativu Suai Vila, Munisípiu Covalima, no faan tais hodi selu oan sira-nia hodi bele eeskola iha universidade privadu no universidade públiku.

“Ha’u soru ema-nia tais pois sira fó osan. Kada tais ida sira fó osan $25.00, bainhira osan ne’e sira fó mai, ha’u uza hodi selu ha’u-nia oan nia eskola, tanba ha’u-nia oan nain rua maka eskola iha Universidade da Paz (UNPAZ) no nain ida iha Universidade Nacional Timor Lorosa’e (UNTL),” nia hato’o lia hirak ne’e liuhusi via-telefone.

Nia hatutan, nu’udar agrikultór la iha dalan seluk atu buka osan, dalan mak halo negósiu kiik oan sira, katuas oan faan dosi, kaben soru tais hodi faan, tanba hakarak oan sira susesu iha futuru.

“Ha’u-nia kaben halo dosi, dala ruma ha’u ajuda faan dosi kuandu tais ne’ebé iha, ema seidauk hola no pesanan la iha. Tenki esforsu tanba oan sira-nia futuru. Ita hatene katak universidade privadu sira selu karun. Ami agrikultór la iha forsa maibé ho esforsu sira ne’e ha’u espera katak ha’u-nia oan sira bele susesu hanesan ema funsionariu sira-nia oan,” nia dehan.

“Benefísiu ne’ebé ami hetan mak, bele hetan osan husi tais ne’ebé ha’u prodúz no husi katuas oan nia negósiu faan dosi. Osan sira ne’e maka ami bele selu ami-oan sira-nia eskola no kompleta ha’u-nia família nia nesesidade,” tenik nia.

Iha sorin seluk, Dionisia Soares Martins nu’udar estudante UNTL ida, orgullu tebes ho inan-aman agrikultor sira-nia esforsu ba oan sira tanba sira-nia esforsu maka’as ba oan sira-nia estudu liuhosi atividade buka moris oin-oin.

“Ha’u nu’udar joven ida no ha’u mós nu’udar estudante ida, ha’u orgullu tebes ho inan domin sira ne’ebé maka servisu maka’as ba nia oan sira-nia nesesidade, li-liu iha nesesidade família no eskola nian, tanba inan-aman ninia sakrifísiu liuhusi atividade sira ne’ebé mak sira halo, hanesan soru tais. Dala barak inan sira soru tais hodi hetan osan oitoan hodi sustenta oan sira-nia eskola,” dehan nia iha Kampus Kaikoli, Díli.

Nia hatutan, inan nia luta ba oan sira boot tebes, tanba ne’e maka ha’u nu’udar estudante apresia tebes ho inan sira ne’ebé luta maka’as ba oan sira-nia futuru ne’ebé maka buka osan liuhusi soru tais hodi investe nesesidade oan sira-nian.

“Nu’udar oan husi inan-aman agrikultór husu ba maluk estudante sira ne’ebé mai husi inan-aman agrikultór esforsu aan hodi bele atinji inan-aman sira-nia hakarak liuhusi sira-nia esforsu ba ita-nia oan sira, tanba ita-nia futuru sira lahatene kolen no la senti loron manas,” nia hakotu.