- Publika iha: 21 Setembro 2024
Komandu Falintil-Forsa Defeza Timor-Leste (F-FDTL), promove soldadu militár hamutuk na’in-neenulu resin haat (64) ba Postu Kabu hodi koloka ba postu sira.
Xefe Estadu Maior F-FDTL,Brigadeiru Jose da Costa “TRIX” hateten komandu F-FDTL forma tan militár husi soldadu ba Postu Kabu hodi hala'o misaun espesífiku sira iha postu sira.
"Ita-nia soldadu na’in-64 ne’ebé ohin ita promove ba Postu Kabu ne’e sei iha responsabilidade direita atu tau matan ba progresu servisu ne’ebé iha postu sira no tau matan ba soldadu sira kada postu ne’ebé koloka sira ba," nia informa.
Nia hatete, militár promovidu ba Kabu ne’e treinadu no iha abilidade hanoin krítiku, kriativu no étiku, nu’udar ema ne’ebé halo ligasaun no peritu ba materia sira iha jestaun atividade loro-loron, formasaun, fó orientasaun ba subordinadu sira no manutensaun forsa, mezmu iha situasaun defisil sira.
"Komandu kontinua fó atensaun hodi estabelese kompromisu institusionál nian, hodi fó dalan ba pesoál militár sira iha Postu Kabu atu hala'o atividade sira ne’ebé presiza ba operasaun kompleksu atual no iha futuru," nia saliente.
Nia dehan, husu ba militár sira atu kaer metin konfiasa ne’ebé mak instituisaun F-FDTL fó atu hala'o ho korajen no abnegasaun ba tarrefa sira ne’ebé atribui.
Iha fatin hanesan, Segundu Komandante Interinu Sentru Instrusaun Komandante Nicolau Lobato Major Luis Pinto, hatete Postu Kabu mais importante iha instituisaun F-FDTL, nu’udar kareira ne’ebé inisia iha nivel komandu nian ne’ebé importante no determinante.
“Xave susesu iha Kabu sira-nia kabas, sira tau sira nia-an iha risku, tanba ne’e iha ita nia mehi maka, Kabu ida ne’ebé kualidade, desididu no determinante,” dehan nia.
Tanba ne’e nia dehan, hanesan Komandante Batallaun Formasaun, agradese no fó konfiansa militárPostu Kabu sira hodi hala'o funsaun iha lideransa nivel postu kabu nian.
Entretantu kursu promosaun Postu Kabu ne’e, hala'o ho durasaun horas 258, fahe ba semana 8 nia laran, partisipa husi militár nain-64 kompostu husi husi Sentru Formasaun Tereno (CFT) nain-30, Kompomente Naval CN nain-6 Sentru Instrusaun Komandante Nicolau Lobato (CICNL) na’in-1,Unidade Apoiu Servisu (UAS) na’in-12, Unidade Polísia Militár na’in-6, no Kuartel Jenerál militár na’in-10.