- Publika iha: 08 Junho 2024
Organizasaun Latter Day Saint Charities (LDSC), husi Hong Kong, apoiu Ministério da Cordenador dos Assuntos Sociais liuhusi Unidade de Missaun Para Combate Stunting (UNMICS) iha Timor-Leste hodi implementa programa nutrisaun ba munisípiu 4.
Diretór Ezekutivu UNMICS, Joel Maria Pereira, dehan kompaña LDSC apoiu implementasaun ne'e liuhusi asina MoU (Memorandum of Understanding) ne'ebé realiza ona hodi implementa nutrisaun integradu hanesan programa pilotu ba iha suku 9 iha munisípiu 4 inklui kapital Díli, Ermera, Bobonaro no Oecusse.
Nia dehan, programa ne'e atu apoiu hahan lokal ne'ebé mak ho nutrisaun ba inan isin-rua, inan fó susu no labarik husi idade 0 to'o tinan 7 hitu.
"Ita servisu hamutuk mós ho grupu agrikultór sira hodi kuda ain lokal, nune'e ita bele apoiu ba benefísiariu husi programa nutrisaun integradu ne'e," nia dehan.
Nia dehan totál benefisiariu ba programa nutrisaun integradu iha suku 9 ne’ebé tama iha tarjetu implementasaun programa nutrisaun integradu ne’e kompostu husi munisípiu 4 ne'e hamutuk benefisiariu na’in 1,000 resin.
"Programa Nutrisaun Integradu ne'e ita implementa hahú husi fulan maiu no finaliza iha fulan dezembru tuir MoU ne'ebé mak ita asina ona," Diretor Ezekutivu UNMPCS Pereira saliente.
Entretantu, Second Counselor Latter Day Saint Charities (LDSC), Elder Michael Teh, dehan sira servisu hamutuk ho UNMICS hodi promove ai-han lokal sira nune’e bele fó apoiu ba benefísiariu sira ne’ebé enfrenta problema mal nutrisaun iha fatin hirak ne'e.
"Ita sei servisu hamutuk nafatin atu bele kontinua implementa programa nutrisaun integradu ba munisipiu seluk hodi kombate mal nutrisaun," nia hatete.