- Publika iha: 02 Setembro 2024
Diretór Saúde Munisípiu (SSM-Díli), Dr. Mateus Pinto, hateten Ministériu Saúde (MS) lansa vasinasaun Fabiloma ba feto ho idade 11 to'o 14, iha loron 20 fulan Jullu hodi prevene moras kankru susun.
Nia dehan, vasinasaun ida-ne'e ba ema feto ho idade 11-14 atu nune'e bainhira sira boot moras kakru susun la bele kona sira, selae sira boot hola mane hetan oan, kankru ne'e fasil atu kona ema liuliu ba foinsaesira.
"Vasinasaun ne'e ita sei tuir eskola sira, atu nune'e bele prevene kedas sira to'o tempu sira hola mane moras ne'e labele kona sira," nia dehan hafoin remata formasaun iha INCSIDA, Pantai Kelapa, Díli.
Nia dehan, vasina ne'e primeira faze sei halo iha MunisípiuDíli, depois Amu Papa fila tiha mak sei kontinua segundu faze ba munisípiu hotu, entaun liuhusi vasinasaun ne'e fiar katak sei prevene moras ne'e.
Nia salienta, agora dadaun pesoál saúde sira no autoridade lokál sira halo hela sensibilizasaun ba komunidade sira, atu esplika ba sira kona-ba vasinasaun ne'e, atu nune'e inan-aman sira komprende hodi fó oan sira mai halo vasinasaun, bainhira inan-aman lakohi labele obriga.
Iha fatin seluk, Diretora Ezekutiva Fundasaun Alola (FA), Maria Imaculada Guterres hateten, durante ne'e sira servisu ho pesoál saúde sira iha hospitál hodi halo sensiblizasaun, hodi hasae komunidade sira-nia koñesimentu oinsa atu bele halo tratamentu ba moras kankru.
"Ami servisu hamutuk ho médiku sira iha hospital hodi halo sensebilizasaun ba komunidade sira, bain hira ami indentifika komunidade sira balun mak hetan moras ne'e ami lori kedas sira ba halo tratamentu iha ospital," nia dehan.
Nia hatutan, iha sosializasaun ne'e oinsa mak atu haklean tan komunidade sira-nia hanoin bainhira moras ne'e kona, tenke ba halo tratamentu lalais, tanba moras kankru ne'e moras ne'ebé perigu ba ema nia moris.