Governu Estabelese Ona Autoridade Marítima

Governu estabelese ona Autoridade Marítima ne’ebé envolve husi liña ministeriál sira hodi hala'o servisu hodi asegura soberania Timor-Leste nian liu-liu kontrola atividade peska ilegál no krime organizadu sira ne’ebé liuhusi tasi.

Ministru Ministério Interior (MI), Francisco da Costa Guterres, dehan estabelesimentu Autoridade Marítima refere kada instituisaun relevante tau ema nain rua hodi bele tau ideia hamutuk nune’e bele halo servisu asegura Zona Marítima Timor-Leste nian.

"Autoridade Marítima ita estabelese ona no kada ministériu relevante ida-idak halo nia servisu liu husi ideia ne’ebé tau hamutuk hodi asegura riku soin Timor-Leste nian iha tasi," nia hatete.

Nia dehan, Autoridade Marítima ne'e iha papel tolu mak hala’o kontolu, buska, ikus mak ajuda governu asegura ekonomia tasi nian.

"Ita tenke halo kontrolu ba atividade ilegal iha tasi hodi asegura riku soin Timor-Leste nian iha tasi ne’ebé mak bele fó rendimentu mai ita," MI Guterres informa.

Entretantu, Prezidente Autoridade Marítima, Comodoro Higino das Neves, dehan funsionamentu Autoridade Marítima ne'e la’o ona no komandu tau ona bote rua iha Oecusse, rua iha Betano, no bote rua iha Atauro hodi fasilita servisu kontrolu iha tasi.

"Dadaun ne'e ita tau uluk bote, tanba ita seidauk iha kapasidade hodi tau ró Lar, tanba Larfoin mak rua no ita seidauk iha kapasidade halo rampa para bele hodi ró Lar tama ba tasi," nia dehan.

Maibé nia dehan, iha ona planu katak ró Lar rua ne’ebé mak iha sei lori ba tau iha Tutuala hodi bele halo operasaun iha parte Norte no Sul.

"Ita la iha ró bo'ot maibé ita iha ona Lar atu bele ajuda funsiona servisu operasaun Autoridade Marítima nian," Comodoro Neves informa.

Nia dehan, hodi fasilita halo prevensaun ba atividade ilegal ruma hanesan peska ilegal nune'e mós bele utilizaba halo salvamentu komunidade balun ne’ebé mak hetan asidente iha tasi.