Hakmaan Inan-Aman Nia Kolen Xinoca Desidi Fa’an Pulseira Liman

Xinoca Xavier nu’udar estudante hala’o nia estudu iha UniversidadenNasional Timor Lorosa’e (UNTL), Faculdade de Ciências Sociais Departamento de Comuninicação Social, desidi hala’o negósiu pulseira liman liuhusi online hanesan facebook no whatsapp, tanba lakohi husu osan beibeik ba nia inan-aman ne’ebé hanesan agrikultór iha munisípiu iha Ainaro.

“Negósiu ne’e ha’u la’ós halo mesak, maibé ha’u ho kolega nain tolu ho Eugénia dos Santos da Asunção nu’udar estudante ne’ebé aprende hela iha (UNTL), Estefánia Salsinha ho Deonizia de Araújo nu’udar estudante ne’ebé aprende iha Universidade da Paz (UNPAZ). Ami nain haat foti desizaun hamutuk hodi prodúz pulseira liman no faan atu bele hetan osan nune’e bele hakma’an inan aman nia kolen”, dehan Xinoca.

Negosiante Xinoca hateten, inisiu nia ho nia kolega sira fó ideia ba malu no halo konkordánsia atu prodúz pulseira liman, hafoin sira kontribui osan kada ema ida $2,75 hodi sosa materiál ba produsaun pulseira liman.

“Pulseira ne’ebé ami halo, ami tau hamutuk osan kada ema ida dolar rua ami tur hamutuk fó ideia ba malu. Primeiru ami sosa sasan sira uza hodi halo pulsiera, pois sosa ai-fuan iha plástiku ida dolar ida ($1.00) nomós iha nia talin, kada talin ida ($1.00) hafoin halo, ami faan liuhusi via-online iha Facebook no whatsapp. Ema pesan mak halo pois entrega ba sira,” nia dehan.

Nia hatutan, pulseira ne’ebé sira prodúz faan ho folin dolar ida ($1.00), loron ida sira-nia grupu bele hetan lukru husi $5.00 ba leten. Sira mós inan-aman agrikultór hotu ne’ebé hela iha munisípiu, sira iha Díli halo atividade ne’e atu bele ajuda sira-nia nesesidade.

“Loron ida di’ak ami bele hetan pesan husi ema nain walu ba leten. Liuhusi ami-nia negósiu ami bele ajuda ami-nia nesesidade hanesan selu bemo, bainhira inan-aman sira iha foho haruka osan mai tarde, no osan balu ami rai hodi sosa fali sasan, nune’e bele kontinua prodús nafatin pulseira,” dehan nia.

Nia mós salienta, liuhusi atividade negósiu ne’ebé sira halo, sira la husu ona osan bemo no fotokopia ba inan-aman.

Iha sorin seluk, estudante eskola bazika iha Díli, inisial JS, ho idade 12 hanesan labarik maibé ajuda inan hala’o negósiu atu hakmaan inan-nia servisu.

“Ha’u mak hakarak rasik ajuda ha’u-nia ama mai faan, tanba ha’u lakohi haree ama mai tur mesak loron tomak hodi faan sasan iha jardin ne’e, tanba ami-nia nesesidade,” dehan nia.

Nia hatutan, dader nia troka nia inan-nia fatin hodi faan sasan no meiudia nia ba eskola, nia ama mak kontinua faan.

“Dadersan ha’u mak faan no lokra’ik ha’u ba eskola, ama mak mai faan fali, ha’u mai faan iha ne’e, atu ajuda ama hafasil ama-nia servisu,” nia hakotu.