- Publika iha: 21 Setembro 2024
Xefe Suku Komoro, Postu Administrativu Dom Aleixo, Munisípiu Díli, Eligio Marçal hateten, totál uma-kain iha Tasi-Tolu ne'ebé hetan ona notifikasaun atu hamamuk fatin hamutuk atus ualu (800), maibé uma-kain atus ida (100) resin mak sei sai uluk.
Nia dehan, komunidade atus ida resin ne'ebé atu sai uluk ne'e, tanba sira hela besik kedas fatin ne'ebé uluk harii bandeira no istóriku, tanba ne'e komunidade sira-ne'e mak sei sai uluk, depois faze tuir mai mak ita haree fali sira seluk.
"Komunidade 800 mak hetan ona notifikasaun husi governu atu hamamuk fatin ne'e antes governu atu ba sobu, liuliu komunidade uma-kain 100 resin ne'ebé hela besik kedas fatin selebrasaun Amu Papa nian, depois hela besik kedas ba bandeira riin istórika ne'ebé harii iha tempu uluk ne'e favór tenke sai ona, tanba tuir planu komunidade uma-kain 100 resin mak tenke sai uluk depois mak hasai tan sira seluk,"nia haktuir iha servisu fatin, Suku Komoro, Díli.
Nia hatutan, tuir loos dia 1 fulan Juñu ne'e atu sobu ona, maibé tanba Sekretariu Estadu Toponimia no Organizasaun Urbana (SEATOU) ukupadu hela ho servisu seluk, maibé dehan fulan ida-ne'e fali, tanba ne'e hein de'it bainhira mak sira atu mai sobu uma sira-ne'e.
"Ita tenke kumpre se governu haruka ita sai, ita sai de'it ona, tanba desizaun hotu governu mak deside, hakarak ita-nia rain sai sidade, entaun ita tenke koopera ho governu," nia salienta.
Iha fatin seluk, Lusiana Marques hanesan komunidade Tasi-Tolu hateten, sira prontu atu sai husi fatin ne'e, maibé governu tenke prepara uluk kondisaun dignu ba komunidade sira.
"Ami prontu sai ona, maibé governu tenke prepara uluk kondisaun, se lae ami sai husi ne'e ami atu ba fali ne'ebé, governu mós tenke hatene katak, ami-nia uma sira-ne'e halo uza ami-nia osan rasik, la'ós governu mak fó hodi halo ami-nia uma, tanba ne'e husu hanoin halo didi'ak lai antes atu mai hasai ami," nia dehan.
Nia hatutan, governu lakohi atu prepara kondisaun, maka komunidade sira ne'e prontu atu mate de'it iha sira-nia uma okos.
"Ami la sai husi uma nia uma ida-ne'e karik governu lakohi prepara kondisaun mai ami, ami prontu para atu mate de'it iha ne'e, lori eskabatór mai suru ami-nia uma suru ho ami dala ida mós ami prontu," nia esklarese.