Xanana: Universidade Tenke Kria Ensinu Kresensiál

Primeiru-Ministru Kay-Rala Xanana Gusmão dehan, atu hadia kualidade edukasaun universidade tenke kria ensinu kresensiál hodi prepara lideransa ba nasaun iha futuru.

Nia dehan, ensinu kresensiál ne'e di’ak ba estudante sira, tanba liuhusi maneira hanorin, deskute, koalia prátika, di’ak tebes ba estudante sira hodi dezenvolve sira-nia kapasidade iha nivel universidade.

"Ita husu governu no universidade sira atu kria maneira ensinu kresensiál ba estudante sira nune'e bele hadia kualidade edukasaun no prepara lideransa di’ak iha futuru," nia dehan.

Nia hatete, tenke kria kondisaun di’ak loke koñesimentu povu nian, liu-liu joven sira hodi prepara ba futuru jerasaun di’ak no lideransa di’ak nasaun nian.

"Ita-nia universidade sira iha misaun bo'ot atu eduka ita-nia oan sira," PM Xanana dehan.

Tanba ne'e nia dehan, atu eduka estudante sira no prepara futuru ne’ebé mak di’ak tenke kria ensinu kresensiál iha eskola.

Alende ne'e Xanana husu ba governu atu haree didi’ak problema sira ne’ebé edukasaun hasoru tenke hadia hahú husi ensinu báziku to'o ensinu superiór atu bele kumpri sistema edukativu ne’ebé mak di’ak iha Timor-Leste.

Entretantu Ministru Ensinu Supérior, Siénsia no Kultura (MESSK) Jose Honório da Costa Pereira Jerónimo dehan, ensinu supérior servisu hamutuk ho Sekretáriu Estadu Formasaun Profesional no Empregu (SEFOPE), INDIMO, Ajensia Nasionál Akreditasaun Akademika ANAA hodi haree kona-ba kualidade ensinu supérior sira iha Timor-Leste.

"Ita iha problema barak ne’ebé mak identifika ona fó impaktu ba kualidade edukasaun iha Timor-Leste, ita sei hadia tuir etapa por etapa," nia informa.

Nia dehan, durante ne'e orienta universidade hotu nia ensinu aprendisajen tuir kurríkulu nasional ne’ebé mak Ministériu Ensinu Supérior prepara ona hodi kontribui ba hadia kualidade.

Iha parte seluk Reitór Unidade Katólika Timorense (UCT) Frei Joel Pinto dehan, ensinu kresensiál ne'e hanesan baze ida universidade sira hodi dezenvolve nia kualidade hodi prepara jerasaun edukativu ida ne’ebédi’ak iha futuru.

"Ensinu kresensiál ne'e importante tebes no universidade sira tenke utiliza maneira ida-ne'e hodi eduka estudante sira, maibéita hare ensinu kresensiál ne'e la’o seidauk másimu," nia saliente.

Tanba ne'e universidade hotu tenke utiliza ensinu kresensiál ne'e ho másimu hodi transforma joven sira hodi prepara ba kontribuisaun dezenvolvimentu Timor-Leste iha futuru.