Governu Tau Orsamentu Millaun $1.5 Hodi Realiza Festival Rabilau

Governu liuhusi Sekretáriu Estadu Arte no Kultura (SEAK) no Ministériu Komérsiu no Indústria (MCI) tau osan millaun $1.5 hodi realiza festival Rabilau.

Sekretáriu Estadu Arte no Kultura (SEAK) Jorge Cristovão da Costa dehan,festival Rabilau ne'e sei realiza prograna halo semináriu kolokiu, feria livru, korida maratona, realiza natal do povu no kompetisaun prezepiu.

"Husi programa hirak ne'e mak ita tau orsamentu hamutuk millaun $1.5 ba realiza festival Rabilau ne'e," nia informa.

Nia informa, Festival Rabilau ne'e mós inisiativa mai husi Prezidente da Repúblika, nune'e mós nai Prezidente konvida nia kolega premiadu Nobel oinoin no peritu sira husi nasaun oi-oin hodi mai partisipa.

"Grupu kultural ne’ebé ita rejistu hodi partisipa iha Festival Rabilau ne'e hamutuk 24,maibé ida-ne'e seidauk tuir estandarte ne’ebé mak iha. Iha mós grupu hirak ne'ebé rejista mai husi munisípiu 13 iha teritoriu laran" SEAK Cristovão informa.

Iha parte seluk Diretór Ezekutivu Luta Hamutuk Jose Monteiro dehan, governu gasta osan ne’ebé mak ho montante bo'ot ne'e, tenke ba programa sira ne’ebé mak lori benefisia ba povu la’ós ba grupu balun de’it.

"Ita hakarak gasta osan bo'ot ne'e hodi halo buat di’ak ba povu hadia povu nia moris, ita haree dadaun ne'e komunidade barak mak halerik hela ba hahan, no hela fatin," nia dehan.

Tanba ne'e nia husu governu di’ak liu tau osan hodi halo dezenvolvimentu, sosa foos hodi apoiu ba povu kbiit laek sira, festival ne'e di’ak, maibé benefisiu ba komunidade ne'e la iha.