- Publika iha: 13 Agosto 2024
Komunidade Suku Aituto, Postu Administrativu Maubisse, Munisípiu Ainaro, kontente ho estudante Universidade Nasional Timor Lorosa’e (UNTL), Faculdade de Ciências Sociais (FCS) liuhusi nia Departamento de Comunicação (DCS) realiza atividade bina-akrab no servisu sosiál iha kapela Ave-Maria, Suku Aituto, Fleixa.
Reprezenta komunidade suku Aituto Sandro Mendes Pereira hateten, sira sente kontente tebes ho prezensa estudante Komunikasaun Sosiál-UNTL, tanba bele ajuda hakmaan sira husi servisu sosiál ba iha kapela ne’ebé konstrui rasik husi komunidade no autoridade Aituto nian.
“Ami sente kontente tebes, tanba estudante Komunikasaun Sosiál-UNTL bele mai ajuda ona ami halo servisu ba kapela ida-ne’e hanesan lalin fatuk, kee rai kuak hodi hada fatuk, liuhusi sira-ne’e hodi bele hakman mós ami husi servisu sira-ne’e. Aleinde ne’e mós ami bele koñese estudante husi universidade ne’e nia lalaok balu bele halo mos servisu sosiál,” dehan nia.
Nia hatutan, atividade hanesan ne’e foin da-huluk halo husi estudante Komunikasaun Sosiál-UNTL iha sira-nia suku Aituto.
“Bina-akrab ne’e atu kria amizade no sira mós halo servisu hodi apoia komunidade, ne’e foin primeira vez estudante Komunikasaun Sosiál-UNTL halo iha ne’e, no ami sente apresia tebes, tanba sente hanesan buat foin ba ami-nia suku ida-ne’e no maské estudante sira sente malirin maibé nafatin fuan boot hodi realiza sira-nia atividade ne’e to’o hotu,” Tenik nia.
Iha fatin hanesan Xefe Suku Aituto Grigorio Lopes Pereira hateten, nu’udar xefe suku Aituto agradese ho prezensa dosente, estudante no alumni sira husi Komunikasaun Sosiál-UNTL ne’ebé hili fatin Aituto hodi realiza sira-nia atividade bina-akrab no servisu sosiál.
“Ha’u nu’udar xefe suku Aituto sente agradese tebes, tanba bele hili suku ne’e hodi realiza imi-nia atividade bina-akrab no servisu sosiál, ida-ne’e tuir objetivu ne’ebé iha, imi-nia fatin ida-ne’e maka, ami-nia ambiente no poténsia suku Aituto,” dehan nia.
Xefe Grigorio rekomenda, departamentu Komunikasaun Sosiál nafatin mantein atividade sira hanesan ne’e hodi hasae kualidade estudante universitáriu nian no liuliu ba siénsia sira ne’ebé aprende iha aula laran.
“Atividade sira hanesan ne’e mantein nafatin, tanba iha tebes benefísiu ba sosiedade sira hodi hatene kona-ba oan sira ne’ebé mai eskola to’o iha universidade no atividade sira-ne’e bele nafatin mantein atu bele hasae kualidade koñesimentu estudante universidade nian liuliu siénsia sira ne’ebé aprende iha prosesu estudu,” nia rekomenda.
Relasiona ho atividade sira ne’e, estudante Sebastiana Ximenes nu’udar Xefe Komisaun hateten, atividade ne’ebé implementa iha Aituto ho objetivu atu lori estudante, dosente ho alumni sira bele kria amizade no halo mós servisu sosiál hodi apoia komunidade.
“Ita la mai halo bina-akrab ou amizade de’it maibé ita mós halo atividade servisu sosiál hanesan servisu fíziku lalin fatuk, hada fatuk iha kapela ajuda badaen sira, halo limpeza, sosializa ba eskola no ikus mak misa agradesimentu hamutuk ho komunidade sira,” dehan Sebastian.