- Publika iha: 25 Setembro 2024
Ensinu Báziku Filial númeru 1 Kaitehu Munísipiu Liquiçá la iha profesór hodi hanorin estudante iha quatro (4) ano.
Diretór Ensinu Báziku Filial Númeru 1 Kaitehu João Coreia dehan, komesa tinan 2019 estudante quatro (4) ano laiha profesór, hahú ano letivu 2024 iha profesór na’in-ida ba estudante quarto ano, maibé to’o fulan Maiu, tanba mudansa husi Ministériu Edukasaun hodi muda fali profesór ne’e ba fatin seluk.
"Durante ne'e ita-nia estudante 4 ano sira laiha profesór, ha’u mak hanorin hotu quatro (4) ano no sexto (6) ano," nia hatete.
Nia hatutan, dalaruma servisu liu, entaun quatro (4) ano tenke abandona de’it, tanba fahe oras lato'o hodi hanorin aula rua-ne'e.
"Ita hato’o ona rekomendasaun ba Ministériu Edukasaun atu aumenta profesór ida mai eskola Ensinu Báziku Filial númeru 1 Kaitehu ne'e, hodi bele lori aula quarto (4) ano maibé seidauk hetan resposta, fiar katak tinan oin bele rezolve," Diretór EBF Kaitehu Coreia informa.
Nia hatete, iha eskola refere totál estudante hamutuk 176 saladeaula 5, kona-ba fasilidade sira seluk sufisiente hodi bele uza durante prosesu aprendizajen la’o.
Entretantu Sekretariu Estadu Ensinu Tékniku Vokasionál (ETV) Domingos Lemos Lopes dehan, dadaun ne'e Ministériu Edukasaun halo hela prosesu ba rekrutamentu profesór ba etapa segundu nian, nune’e hodi responde ba eskola sira ne’ebé sei menus profesór.
"Ita sei esforsu hodi aselera rekrutamentu ba profesór no profesóra sira iha faze segundu hodi koloka ba eskola Báziku Filial Kaitehu nune’e mós eskola sira seluk," nia salienta.
Sekertariu Estadu ne’e husu ba profesór sira kada eskola atu aguenta hanorin lai tuir kbiit ne’ebé iha, hodi hein Ministériu Edukasaun rezolve problema menus profesór.