- Publika iha: 23 Setembro 2024
Timor-Leste Programa Development Police (TLPDP) apoiu rádiu komunikasaun hamutuk limanulu (50) ba Polísia Nasionál Timor-Leste (PNTL) hodi utiliza ba apoiu servisu seguransa nian.
Komandante Administrasaun PNTL, Superintendente Xefe Polísia, Natercia Martins, hatete, ekipamentu hirak ne’e importante tebes hodi ajuda polísia nia servisu liu-liu iha operasionál hodi bele responde ba seguransa iha rai-laran.
"Ita agradese tebes ba Timor-Leste Police Development Programme (TLPDP), tanba apoiu ona rádiu komunikasaun hamutuk 50 hodi fasilita PNTL liu-liu iha servisu operasionál nain," hatete.
Nia dehan, alende apoiu radiu komunikasaun 50 ne'e sira apoiu mós ho rompi hamutuk 500 ba nune’e hodi utiliza ba servisu loron-loron nian.
"Durante ne'e TPLDP mós fó apoiu ba iha PNTL iha área oin-oin hanesan, kapasitasaun rekursu umanu, infraestrutura halo edifisiu ba PNTL, apoia transporte no seluk tan," Komandate Administrasaun PNTL Superintendente Xefe Martins informa.
Nia hatene, TLPDP nafatin apoiu PNTL bainhira presiza sira prontu apoiu hodi halo dezenvolvimentu ba instituisaun seguransa nian liuliu Polísia Nasionál Timor-Leste.
Entretantu Xefe TLPDP Australia Diminic Zappavigna, hatete, apoia ne’e pozitivu tebes, tanba PNTL ne’e nu’udar parseiru di’ak ba TLPDP.
“Apoia ida-ne’e ita halo atu PNTL bele utiliza hodi fó seguransa ne’ebé seguru ba sosiedade iha Timor-Leste," nia saliente.
Nia saliente, apoiu ne'e bazeia ba planu estratéjiku TLPDP nian, no dadaun ne'e sei kontinua halo instalasaun ba tore radiu nian iha territóriu laran tomak.