Estefania Luta Ba Alin Sira-Nia Futuru Liuhusi Fa’an Sasan Iha Estrada Ninin

Feto Joven Estefania Maia Cardoso nu’udar oan feto boot hosi Armindo Maria de Araújo no Fatima Cardoso Gonçalves, desidi fa’an sasán iha estrada ibun Tasi-Tolu munisípiu Díli, hodi bele ajuda nia alin sira-nia estudu.

Nia dehan, maské nia labele kontinua nia estudu, maibé nia lakohi atu nia alin sira hanesan ho nia, tanba ne’e nia hakarak ajuda nia Pai ho Mãe hodi bele suporta nia alin sira-nia futuru.

“Ha’u husi munisípiu Ermera. Agora dadaun ha’u hela iha Kampung Baru Díli. Ha’u remata ha’u-nia estudusekundáriu iha tinan 2021. Agora ha’u-nia tinan 23 anos, no dadaun ne’e ha’u la kontinua ha’u-nia estudu, tanba Pai Mãe laiha kbiit atu suporta. Entaun husik ha’u mak la bele eskola nune’e ha’u tenki ajuda fali Pai Mãe hodi suporta fali alin sira ba iha sira-nia futuru,” dehan Estefania iha estrada Tasi-Tolu.

Nia hateten, nia fa’an sasán iha estrada Tasi-Tolu tama ona tinan ida ho balun, nia nafatin halo ida ne’e,tanba nia lakohi nia alin na’in-lima (5) nia futuru hanesan ho nia.

“Ha’u mai fa’an sigarru iha estrada Tasi-Tolu ne’e, tinan ida ho balun ona. Hein husi dadersan to’o lorokra’ik, meiudia sosa etu han de’it tiha estrada ibun. Iha ha’u-nia Pai Mãe ha’u mak nu’udar oan feto boot, ha’u ihaalin na’in lima (5), feto na’in-tolu (3) no mane na’in-rua (2).

Ha’u nu’udar oan feto boot ha’u mak tenki esforsu ajuda Pai ho Mãe hodi haree fali ha’u-nia alin sira-niafuturu, maské ha’u mak la eskola, importante sira-ne’e tenki eskola para ba oin ne’e, sira-nia futuru bele di’ak,” hateten Estefania.

Nia salienta, nia sei luta ba nia alin sira-nia futuru ho maneira oi-oin hodi hetan osan, atu nafatin fo suportatuir nia forsa.

“Ha’u sei luta nafatin ba ha’u-nia alin sira-nia futuru liu hosi saida mak ha’u halo, buat ne’ebé ha’u bele halo ha’u sei esforsu hodi halo ba ha’u-nia alin sira-nia futuru,” nia hato’o.

Iha fatin hanesan negosiante Sara Gomez hateten, nia nu’udar kaben-na’in, nia fa’an sasán iha estrada ibun husi dader to’o lorokra’ik, tanba família nia nesesidade.

“Ha’u iha oan na’in-rua, ida eskola ona no ida seidauk eskola. Katuas oan servisu iha loja maibé ida-ne’e la to’o, tan ne’e ami fa’an sigaru hanesa ne’e, tanba ami-nia presiza, labarik nia eskola, fulan ami selu kost.

Ami fa’an iha ne’e, Walikota tun mai duni hela de’it. Sira mai duni, ami hein sira fila tiha, ami mai fa’annafatin, tanba se ami la fa’an oinsá ho ami-nia presiza. Tanba ne’e, ami lor-loron tur iha ne’e fa’an sigarru haree ba ami-nia moris, ami tur hosi dader to’o lorokra’ik hetan netik lima dolar $5.00,” nia hakotu.