- Publika iha: 23 Setembro 2024
Diretór Servisu Apoiu Diagnóstiku no Terapeutiku iha Hospital Nacional Guido Valadares (HNGV) dr. Vidal de Jesus Lopes hateten, HNGV nakloke ba krítika sira hotu, maibé tenke ho karakter konstrutiva, atu nune’e, HNGV bele hadia nia sistema sira-ne’e hodi bele halo atendimentu ida ne’ebé di'ak liután.
“Durante ne’e preokupasaun husi públiku ka individu ou grupu balun kestiona liga ho sistema ka lala'ok servisu HNGV nian ne’ebé fó sai husi Mortuáriu nian dehan ema mate barak, ida-ne’e iha hela prosesu investigasaun nia laran, atu bele hatene loloos informasaun sira ne’ebé individu balun fó sai,” nia dehan iha knaar fatin, iha salaun enkontru HNGV, Bidau Díli.
Nia klarifika katak, preokupasaun ne’e públiku ne’e HNGV sei buka tuir hodi halo investigasaun, bainhira iha prosesu investigasaun mak identifika lakuna balun, ekipa sei relata bá parte relevante jurídiku, nune’e kontinua kanaliza ba parte kompetente.
Nia mós husu ba públiku katak, HNGV nafatin kontinua simu krítika hotu ne’ebé mai husi ema hotu, atu nune’e HNGV bele hadi'a di'ak liután sistema servisu iha HNGV, maibé públiku mós atu halo krítika tenke iha evidénsia ruma.
Iha parte seluk, Xefe Bankada FRETILIN, Deputadu Aniceto Longuinhos Guterres Lopes, hateten, sistema saúde ne’ebé to’o agora sei nafatin enfrenta problema, enkuantu iha inísiu IX Governu halo komprimisu atu garante imediata disponibilidade medikamentu hotu no nesesidade ospitál no sentru saúde sira to’o agora la rezolve.
“Problema saúde ne’e hahú husi kedas Hospitál Nasionál Guido Valadares, ospitál rejionál to’o sentru saúde no postu saúde sira, situasaun ne’e akontese, tanba in kapasidade governu nian iha planeamentu no jestaun, tau interese grupu no partidu nian aas liu, hodi fó projetu kompra medikamentu ba malu hodi viola tiha rejime aprovizionamentu Timor-Leste nian,” nia dehan iha plenária Parlamentu Nasional, Dili.
Nia esplika Orsamentu Retifikativu, Parlamentu Nasionál aprova $6 milloens, iha Orsamentu Jerál Estadu 2024, Parlamentu Nasionál aprova tan $4.3 milloens, maibé problema saúde to’o agora kontinua eziste iha territóriu laran tomak.