- Publika iha: 23 Setembro 2024
Governu liuhusi Sekretáriu Estadu Arte no Kultura (SEAK) no Ministériu Edukasaun deside ona uniforme nasionál eskolár mistura ho tais.
SEAK Jorge Soares Cristovão dehan, governu deside uniforme nasionál eskolár mistura ho tais ho objetivu atu promove identidade Timoroan nian.
"Ita deside ona mistura tais ba uniforme nasionál eskolár no dadaun ne'e prosesu lao dadaun ona entre Ministériu Edukasaun no SEAK nian ba prosesu produsaun," nia dehan.
Nia dehan, apende mistura tais ba uniforme nasionál eskolár, SEAK ho ME mós halo hela prosesu integrasaun tais ba kurríkulu nasionál hodi bele hanorin ba estudante sira iha eskola.
"Dadaun ne'e ekipa tékniku sira elabora hela matéria ida hodi inklina iha kurríkulu," SEAK Cristovão dehan iha knaar fatin Pantai Kelapa, Díli.
Nia dehan, inklui iha kurríkulu no sei hanorin ba estudante sira hahú husi ensinu báziku primeiru siklu to'o ensinu sekundáriu.
"Ita tau tais iha uniforme eskola nasionál no intrega mos ba kurríkulu nasionál ne'e hodi eduka ita-nia oan sira atu koñese didi’ak ita-nia identidade no bele promove ba mundu," nia informa.
Entretantu Ministru Edukasaun Interino Domingos Lopes Lemos dehan, kona-ba uniforme nasionáleskolár ne'e tenke mistura ho tais, nune’e bele reprezenta identidade nasionál Timor nian.
"Ministériu Edukasaun hetan apoiu husi SEAK kona-ba modelu no mistura tais ba uniforme nasionál eskolár hanesan mós ho uniforme ba funsionáriu públiku sira," nia dehan.
Tanba ne'e nia informa, dadaun ne'e iha ona prosesu nian laran kona-ba produsaun uniforme nasionál eskolár ne'e no iha tempu besik eskola sira sei utiliza.